YiNtatheli kaMthunywa
AMALUNGISELELO aphezulu kumncintiswano wokugijima kuziqinti zeMatabeleland North oweNestle Healthy Kids, nanko kubikwa sekuvumbuluke ithalenta elimangalisayo kulesisabelo.
Inhlanganiso yabaphathi bezikolo ze-primary iNaph ibambene lenkampani yeNestle ziqoqa umncintiswano lo ozaqhubekela phambili lapho izabelo sezidibene edolobheni leBindura ngenyanga ezayo.
Amathimu ezikolo kuziqinti zeMat North iBinga, Nkayi, Tsholotsho, Umguza, Hwange, Lupane leBubi azadibana kumcimbi wezokugijima esikolo seLoziba primary eNyathi ngenyanga elandelayo.
Umgcinisihlalo weNaph esabelweni seMat North uJohn Ndiweni uthe okwakhathesi iziqinti zonke ziphitsheka ngokulungisisa okuthile kumathimu azo.
Isigaba seNyathi siyaqala ukubuthanisa izikolo kumncintiswano omkhulu njengalo osekelwa yinkampani yeNestle.
Lonyaka kubikwa imidlalo ye-physical education egoqela le-gymnastics izabe ikhona.
“Iziqinti zethu zonke ziyadibana esikolo seLoziba eNyathi. Sikhangelele ukuthi amathimu wonke kuziqinti eziyisikhombisa atheleke eNyathi mhlaka 10 Mbimbitho ukuze senelise ukuqala umncintiswano mhlaka 11 kusiya ku-12 Mbimbitho.
“Umdlalo we-gymnastics ophuma kuzifundo ze-Physical Education uzancitiswa njalo ngabantwana abangaphansi kweminyaka engu-11 yokuzalwa.â€
UNdiweni ubonge kakhulu ukuphathisa kohlelo lwe-Nestle Healthy Kids ngoba usuguqule indlela izikolo eziphatha ngayo umdlalo wokugijima.
Uthe abantwana abanengi sebevuleke amehlo ngokuqakathekisa ithalenta lokugijima kanye lokukhuthalela ezempilakahle.
“Inhloso yalumncintiswano ngeyokuthi abantwana bavuselele amathalenta abo, ayiwo azabaphilisa kwelakusasa. Nxa begijima bencintisana kanje kubumba ubudlelwano obuhle labanye abantwana bakwezinye izikolo. Imidlalo yokugijima izaphathisa njalo ukuthi bafunde ukugcina imizimba yabo,†kutsho uNdiweni, owaziwa kabanzi ngobukhokheli bakhe kwezemidlalo kuzikolo zeMat North.