uMthunywa
YiNtatheli kaMthunywa
ZITSHONE ziphaphatheka izakhamizi zeMagwegwe koBulawayo ngoMvulo zigijimisana lendwangu ethutshe ivela ePelandaba West igqize amangqongqo andubana iqale ukungena ezindlini zabantu ibhidliza impahla.
Indwangu le ithutshe eMagwegwe ekuseni igijinyiswa ngabafana akade besithi basuke layo elokitshini lePelandaba West. Intatheli kaMthunywa ifike ngesikhathi izakhamizi akade zincedisana ukuyigijimisa zibuthene, isingene kwenye indlu yazivalela phakathi.
Intatheli kaMthunywa ikhulumisane lomunye wezakhamizi zeNew Magwegwe Flats, uNkosazana Tendai Geja lapho indwangu efike yazivalela khona.
“Mina bengizilalele, ngizwe ngomsindo wabantu sebememeza phansi besithi kulendwangu ngaphuma ngalunguza kanti ingene endlini yami yokuphumula.
“Ingene endlini yafika yawisa umnyango we-room divider yasicatsha ngemva kwayo. Isimanga yikuba iqale ukudinga ukudla yazidlela imacaroni ebikhona endlini yatshiya ichithe okunye ukudla,” kuveza uNkszn Tendai Geja.
Intatheli kaMthunywa ibuye yaxoxisana loMnumzana Ntando Ndlovu othe indwangu le itshiye yonile okweqiniso.
“Indwangu le itshiye idale umonakalo ezindlini zethu ngoba khathesi ngikhuluma kuzamele ngiyethenga amazenge lamawindi ngoba kufile abafana bejikijela indwangu,” kuveza uNdlovu.
Omunye wabomakhelwane othande ukuvezwa ngokuthi NakaMpumi ubikele elikazulu ukuba indwangu itshiye yenze izimanga komakhelwane.
“Indwangu le itshiye yenze izimanga komakhelwane wami uNakaMillicent ifike yadla isinkwa lamatamatisi khonapho endlini ngaphambi kokuba ikhutshwe ngabafana akade befuna ukuyitshaya,” kuveza uNakaMpumi.
Iphephandaba likazulu lizwe ukuba ngemva kokuba betshone beyigijimisa indwangu icine isibulewe ngomunye wabogweja beMagwegwe ngemva kokuba ingene kwenye indlu izama ukucatsha.
