uMthunywa
Thokozile Mbedzi
Bekungabizwa ozwayo kumqhudelwano webhola labafana lamankazana koChireya eGokwe lapho induna yakulindawo esungule khona iGala ezaba khona minyaka yonke ukuze ithuthukise abasakhulayo babe lentshukutshu kwezemidlalo. Imidlalo le idlalwe mhlaka 1 kusiya ku-7 Ntulikazi.
Amaqembu angaphansi kwesigaba senduna abethe gwaqa wonke ukuzoveza ubungcitshi bawo ngoba bekulemivuzo etshiyeneyo ebiqoqelwe abadlali laba yinduna yabo.
Iqembu elinqobe amanye wonke elithole inkomo ngelesigaba seNembudziya lona elithole inkomo lesicoco, elesibili ngeleMadzivazvido lona elithole imali engange-RTGS$400, i-kit lamabhola amabili, eyesithathu ngeyamantombazana yona ethole isicoco lempahla yokudlala.
Abadlali laba sokungumnyaka wesibili behlangana kumdlalo lo ukuba baveze ubungcitshi babo ukuze bathole amathuba okufunda kunye lokuphakamisela phezulu ubungcwethi abalabo baye phambili bacine sebekwelinye izinga laphezulu kwezemidlalo.
Ekhuluma lentatheli kaMthunywa Induna yakulindawo uChiya uChireya uthe iGala le uyisungule ngenhlonso yokuba athuthukise ezemidlalo esigabeni sakhe njalo wenzela ukuthi labo babone ukuthi ezemidlalo zilakho ukubaphilisa njengeminye imisebenzi ekhona ngakho kumele beyithathele phezulu.
“IGala le ngayisungula ngomnyaka ophelileyo ngenhloso yokuba ngithuthukise ezemidlalo esigabeni sami, okwakathesi kudlalwa ibhola lenyawo labafana le-netball.
Ngifisa ukuba leminye imidlalo idlalwe ngokuya kwesikhathi ngoba lokhe ngizama ukuba bonke abazabe bephatheke kumqhudelwano le bathole imivuzo. Imivuzo le siyipha abadlali laba njengendlela yokuthi babe lentshukutshu yokwenza okuhle ngoba bonke abayabe bephatheke emidlalweni le bayathola imiklomelo ehambelana lokudlala abakwenzileyo.
“Sidinga njalo ukuphathiswa ukuze abadlali laba sibaphe imivuzo emihle ukuze labo bazizwe bephatheke kuhle nxa sebeqede ukudlala.”
Uqhubekele phambili uChireya esithi ukhangelele ukuthi iGala le iyephambili iphinde ithole usekelo oluvela kunhlangothi ezitshiyeneyo njalo uzazama ngawo wonke amandla ukuthi minyaka yonke ibekhona.
“Ngizazama ngawo wonke amandla ukuthi iGala le ibekhona minyaka yonke ukuze abadlali labo babe lokulungiselelela belethemba lokuba balungiselela umdlalo ozaba khona. Ngilokuthokoza okukhulu kakhulu ngoba bekulabahlonitshwa ababuye bazokuba lathi kuGala le ababalisela uEdison Chakanyuka,” kuphetha uChireya.
