uMthunywa
Listen Ndlovu
INDUMBA yisilimo esingahluphiyo ukulima njalo esiphangisayo ukuvuthwa.
UMnunzana Mandlenkosi Tshabangu ongumlimisi kunkampani yeFarm and City ukhuthaze abalimi ukuthi nxa befisa ukulima isilimo esingaphuziyo ukuvuthwa njalo esingahluphiyo bangalima indumba.
Uthe indumba zingalinywa kusukela khathesi kusiya kunyanga ezayo.
“Okudingakalayo yikuthi umlimi asebenzise inhlanyelo eqondileyo ngoba ziyahlupha ukumila nxa umlimi engasebenzisa inhlanyelo esidlulelwe yisikhathi okucina kubangela ukuthi ingamili kuhle njalo isivuno sinciphe,” kuxwayisa uMnu Tshabangu.
Ubuye waveza ukuthi indumba azikhethi umhlabathi okuqakathekileyo yikuthi umlimi alandele indlela eqondileyo yokuzilima.
“Umlimi kumele alalise isilinganiso sendumba azazilima emanzini ukuze zimumathe amanzi.
Lokhu kwenzelwa ukuthi zimile masinyane. Inhlanyelo yendumba ifuna umhlabathi omanzi ngakho kubangcono nxa umlimi sezifaka phansi zibe zimumethe amanzi ukwenzela ukuthi zingahlali isikhathi eside phansi,” kutsho uMnu Tshabangu.
Uthe lokhu kungenziwa ngendlela kuthatha amalanga amahlanu kusiya kwayisikhombisa ukuthi kumile.
“Umlimi akumelanga atshiye indumba ayabe ezilalise emanzini nxa esehlanyela ngoba ngeke zimile nxa sezihlanyelwa ngemva kwensuku ezimbili ziphakathi kwamanzi.
“Okunye okubalulekileyo yikuthi akumelanga kugejwe amagodi atshona kakhulu nxa kulinywa indumba. Igodi linye ngalinye kumele litshone ngamasentimitha amahlanu kukanti imizila kumele itshiyane nge 5 kusiya ku-10cm.
“Umlimi nxa engalandela izixwayiso lezi sengakhangelela isivuno sakhe esihle ekupheleni kwesigaba sokulima,” kuxwayisa uMnu Tshabangu.
Uthe okunye okudingakalayo kumlimi yikuthi aqaphele isilimo sakhe singahlaselwa yimikhuhlane.
