uMthunywa
Blessing Moyo
ABABONA ngezokulima abe-Agritex sebexwayise abalimi ukuthi bangesabi ukulima indumba ngoba zingalinywa yiloba ngubani.
UMnumzana Dumisani Nyoni onguMatabeleland North Provincial Agritex Officer ubikele uMthunywa ukuthi labo abafisa ukulima indumba zokudla ngekhaya lalabo abafuna ukulima ezokuthengisa bonke bangalima indumba ngoba yisilimo esingatshayisi ngekhanda.
Uthe indumba yisilimo esingalinywa kundawana zonke zelizwe futhi esilula kakhulu ukusilima kuphela nje umlimi kumele abone ukuba kazilimi endaweni ema amanzi.
“Indumba zingalinywa kundawana zonke zelizwe futhi ziyavuma ukulinywa zithelezelwa loba ukulinywa ngesikhathi sezulu.
“Umlimi kumele abone ukuba uzilima emhlabathini olinganayo okungasoze kume amanzi nxa izulu linile kumbe nxa eqeda kuzithelezela.
Indumba
“Kudala isimo sezulu singakaguquki bezilinywa ngoZibandlela kodwa khathesi ngenxa yokutshintsha komkhathi sezilinywa ngoMpalakazi,” kuchaza uMnu Nyoni.
Uthe indumba ziyancedisa kakhulu ukuvundisa umhlabathi njengoba kuvele kukhuthazwa ukuthi abalimi batshintshanise izilimo emasimini abo.
“Abalimi sihlala sibakhuthaza ukuthi okunye njalo nxa ungumlimi bona ukuthi awulimi isilimo sinye kuze kube kathathu endaweni eyodwa, hlala utshitsha izilimo zakho lapho obukade ulime umumbu lonyaka ungafaka amabele ngomnyaka ozayo, lokhu kuyancendisa ekuvundiseni umhlabathi.
Uqhubeke esithi ukhuthaza abalimi ukuthi balime indumba sekusele amaviki amabili ukuthi inyanga kaMpalakazi iphele ukuze kuthi kusiyafika inyanga kaNhlolanja zibe sezilamaluba okuzala ngoba uNhlolanja katshisi okuyisimo esifunwa yisilimo lesi nxa sesilempoko.
“Kuqakathekile ukuthi umlimi abone ukuthi isikhathi sokutshisa sithi sifika indumba lezi sezilabantwana ngoba nxa kungafika ukutshisa zisanda kukhipha amaluba ziyaphunza zingasabi labantwana umlimi acine engasavunanga lutho emasimini.
“Umlimi angalima indawo engaba ngamahekitha angu-80 nge-100kg yenhlanyelo yendumba njalo esebenzise umvundiso we-Compound D ulakho ukuzitshayela inala emangalisayo,” kuphetha uMnu Nyoni.
