uMthunywa
Wayne Ncube
Inhlanganiso yeZimbabwe Farmers Union isikhuthaze abalimi ukuba balime indumba ngoba ziyaphangisa ukuvuthwa njalo kazidingi ukuthi usebenze kakhulu njalo imithi edingakalayo milutshwane nxa uzilimile.
Ekhuluma lentatheli oyingxenye yenhlanganiso le aphinde abe ngumlimisi ngaphansi kwenhlanganiso uMnumzana Mkhumbuzi Siziba uthe abalimi bengakhangela ukulima indumba ngoba zingabalethela inzuzo enhle njalo umlimi ohlakaniphileyo akayi kulahla ithemba ngokutshiswa kwelanga angahlanyela izilimo eziphangisa ukukhula ezifana lendumba.
“Indumba ziyaphangisa ukuvuthwa, nxa ulima ngokuthelezela.
“Imihlobo yendumba efana lomaqutha ziyaphangisa ukuvuthwa, njalo umlimi usengathola lombhida kumahlamvu endumba ayomise athengise sokungumfushwa,” kulandisa uMnu Siziba.
Uqhubekele phambili wathi abalimi kumele bazi izilimo eziphangisa ukuvuthwa ezingahluphiyo ezivuthwa ngesikhathi esifitshane.
“Mina ngithe ngibona umumbu wami usutshile ngahle ngadinga inhlanyelo yendumba ikakhulu lezi ezesintu ezemakhaya, ngihlanyelile sezimilile njalo ngizaqhubeka ngizithelezela zize zivuthwe,” kuchaza uMnu Siziba.
Ugcizelele wathi ukulima indumba kanye lezinye izilimo eziphangisa ukuvuthwa kulicebo elihle kakhulu.
“Inengi labalimi eMatabeleland North lilahlekelwe sibili. Salima kungela zulu izilimo zatsha, kodwa akumelanga silahle ithemba njengabalimi. Kumele silime khonokho okuphangisa ukuvuthwa, indumba zona kaziphuzi ngitsho njalo ekuvuthweni kwazo akuphumi ndumba zodwa lemibhida uyayithola.”
“Okuqakathekileyo yikuthi njengabalimi silalele ababona ngezomkhathi nxa besithi izulu lizakuna ngasiphi isikhathi, singagijimeli ukulima kungela zulu ngoba siyabe sesidlalise inhlanyelo,” kuphetha uSiziba.
