uMthunywa
KUXABENE ubendle emdenini wakwaMbhele, eBulwer njengoba kuvela ukuthi indodakazi yakhona ikhuleliswe lisoka likanina ongumfelokazi.
Ngokuthola kweSolezwe ngoMgqibelo, uNkszn Zandile Mbhele (34) ukhuleliswe lisoka likanina, uMnu Mzwamandla Chonco (46).
Kuthiwa unina wendodakazi, uNkkz Mbhele elingatholakalanga igama lakhe, ubhodla umlilo ngalolu daba. Useze waxotsha indodakazi endlini, ekhala ngokuthi imhlinzele ezibini.
ISolezwe ngoMgqibelo likhulume laye uNkkz Mbhele obezwakala ekhathazekile kodwa wakuveza ukuthi ngeke yena “afuye” isilwane emzini wakhe.
Uthe isenzo sendodakazi yakhe usifanisa lesobulwane uqobo. Uveze ukuthi bebekade belobudlelwane obuhle kakhulu lendodakazi yakhe yonke le minyaka.
Uthi kodwa baqale ukuklwebhana eminyakeni emibili eyedlule ngesikhathi kudlula emhlabeni umyeni wakhe onguyise wendodakazi, uMnu Zakhele Mbhele.
Uveze ukuthi indodakazi yakhe iqalile yenza izinto angaziqondi.
“Indodakazi yami yangibuza ngomnyaka odlule ukuthi ngimqomeleni omunye umuntu wesilisa kungakapheli ngitsho iminyaka emihlanu uyise etshonile,” utsho kanjena.
Ngokutsho kwakhe, uthi wazama ngakho konke okusemandleni ukuchazela indodakazi yakhe ngendlela azizwa ngayo ngesoka lakhe elitsha.
Wale waphetha ukuchaza ukuthi uthole kanjani ukuthi indodakazi yakhe elezinyanga ezine izithwele, ikhuleliswe lisoka lakhe.
Akutshilo nje ukuthi uyakuvuma ukuthi indodakazi yakhe imudle izithende.
“Angilandaba mina noma ungabhala utshele umhlaba wonke ukuthi indodakazi yami ingumuntu onjani,” utsho kanje eseqala ukukhutshukelwa umoya.
Uthe indodakazi yakhe useyixotshile ekhaya, wathi uzwile ukuthi ibaleke lalo isoka lakhe.
Uthe kubafanele vele ukuhlala bobabili ngoba bayizinyoni zohlobo olulodwa.
ISolezwe ngoMgqibelo likhulume lendodakazi, yabhoka ngolaka yabuza ukuthi iphephandaba lingena kanjani ezindabeni zalo zocansi lokukhulelwa?
Kuthe intatheli isaqhubeka iyihloma ngemibuzo yavala ucingo.
Intatheli ibuye yakhuluma lalo isoka lavuma ukuthi kukhona okungahambi kahle okwamanje phakathi kwalo lomama lendodakazi.
Lithe “lalo lingumuntu wesilisa”, lathi lehluleka “ukungawudli uswidi” uma linunuselwa ngawo yindodakazi.
Lithe liyazazi ukuthi lilecala, lathi kodwa lokho akuchazi ukuthi sekufanele kunamekwe igama lalo ephephandabeni.
Lithe lihlezi layo indodakazi ngoba kumele liyinakekele ngoba ikhulelwe. -Ubulembu
