Indoda yinhloko yomuzi – umuzi ngumama – indoda libhetshu lomziki

03 May, 2023 - 00:05 0 Views

uMthunywa

Sikumbuzo Dabengwa

Umuzi likhaya elifudumeleyo njalo eligcwele injabulo lokuthula. Likhaya lapho izingane ezithola ukukhuliswa kuhle zinakekelwa ngabazali bobabili bexhasana ukuze bakhulise abantwana laba ngendlela eyiyo.

Umbhalo uyatsho kwabaseKholose lwesine, nxa sibala kundima yetshumi lasikhombisa ukuba uAkhiphasi, inkonzo ayifunjathisiweyo ayenze ayiphelelise. Lokhu kusitsho ukuba umuntu lomuntu kukhona okumele akwenze akuphelelise ekuphileni kwakhe.

Nxa uzakuba ngubaba mfundi, kukhona okumele ukwenze ukuphelelise. Ongumama laye kukhona okumele akwenze akuphelelise. Nxa kungasenzakalanga lokhu kusuka umphakathi usole lanxa nje ungeke wakuqonda ukutshele. Silawo amazwi ayekhuthaza umama lobaba ekhaya ukuba basebenze ngokuzikhandla emzini wabo.

Lekulayeni lapha ayasetshenziswa ukuze laba ababili bahambe ngonyawo oluqondileyo. Akuswelakali ukuba ibekhona eminye imilayo esiNtwini esesizibuza khona ukuba yayikhulunywa kodwa kuyindlela yokuvuma ukuba sekonakele, asiqhubekeni ngempilo singadilizi osekubunjiwe.

Asikhangeleni amagama alandelayo siwahlolisisa. Singatsho lawo angasafanelanga ngoba izinsuku ziyaguquka. Obekuphilisa izolo ungakuthola sekuphilisa nzima lamuhla.

Indoda yinhloko yomuzi
Nanka amagama esithi nxa singawakhuluma ijaha, indoda, abantwana, umama lozulu wonke azi ukuba lo osethethe kumele ahlonitshwe njalo aphiwe indawo yakhe kulelikhaya ngoba eyiyo inhloko, inkokheli yalelikhaya. Ngamazwi abekhuza lalapho sekukhona ukungalalelani ekhaya kungakhathalekile ukuba ngubani ophambanisayo. Kuhle ukuba umuntu wonke azi ukuba umuzi lomuzi ulenhloko yawo. Nxa inhloko ingasalalelwa sisuke sithi kulowomuzi sekukomachanca, kompunzi idla emini ngoba akuselamthetho.

Umuzi ngumama
Nanka amazwi enkuthazo kuye wonke owesifazane. Lapha sigqugquzela ukuba umuzi unakekelwa ngumama. Ukuze umuzi ufudumale kudliwe lapha ekhaya umama ulomlandu wokuba abone ukuba konke kuhamba ngendlela. Ukuthi abantwana badlile njalo bagqokile ngumama. Kanti njalo lezethekeli lapha ekhaya zemukelwa ngumama aziphathe kuhle. Umama olivila, ongelandaba leguma lakhe uswela ukuhlonitshwa umuzi wakhe ubelula ungabi lesizotha. Kuyatshiwo lanxa inhloko ixegisa lapho kuqiniswa owesintwana ukuba abambe ziqine.

Indoda libhetshu lomziki
Nanka amagama ayekhulunywa kubobaba ababeziphatha njengamajaha alokhu esemjahweni kodwa wona esekhulile. Ngithemba uMziki siyawazi njengenyamazana enhle kakhulu. Pho kwakusitshoni ukuba indoda libhetshu lomziki? Kambe lanamhlokhu kungabe kusasebenza yini yona imikhuhlane isibhahe kangaka? Kanti yindoda enjani ethi ilomuzi iqolotshe phandle njengethole elingunkanise? Okunye bafundi akuyekwe!

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds