Thando Dube
KULENDODA yelokitshini leNtumbane koBulawayo egwetshwe ukupika ejele okwenyanga ezilitshumi lanhlanu ngecala lokutshontsha lelokubhuqa unina.
UEmmanuel Nduwa oleminyaka engu-30 yokuzalwa umiswe phambi komthethwanda we-Western Commonage esetheswa icala lokutshontshela unina uSenzeni Nduwa ongumamangala i$200 kanye lokumtshaya.
Kutshutshisa uMnumzana Arthur Marine, inkundla izwe ukuthi mhlaka 25 Zibandlela umetheswacala watshontsha izihluthulelo zekamelo likanina wangena watshontsha i$140 unina engekho evakatshele izihlobo. Ekuphendukeni kwakhe umamangala wacabanga ukuthi wayelahle amakhiye akhe wacela umakhelwane wakhe ukuthi amncedise ukuvula umnyango
Mhlaka 29 Zibandlela umamangala ebusuku elele wezwa umuntu ezama ukuvula ikamelo lakhe lokulala wananzelela ukuthi ngumetheswala. Wacela ukuthi amuphe amakhiye akhe kodwa umetheswacala waphakamisa umamangala ngenyawo wamphosela phansi wangena endlini wathatha i$60 wahamba layo.
Omakhelwane yibo abancedisana lomamangala ukubamba umetheswacala bamhambisa emapholiseni okwabangela ukuthi abotshwe i$60 yatholakala.
Ngemva kokulalela icala umatshi uNkosazana Tancy Dube unqume ukuthi umetheswacala apike okwenyanga ezingu-21 ezinhlanu nxa umsolwa ethe waziphathya kuhle, ezimbili zakhitshwa ngenxa yokuthi kufanele abhadale imali ayitshontshayo. Umsolwa uzachitha inyanga ezingu-14 evalelwe ejele.