AMAPHOLISA eLebowakgomo ngaphandle kwePolokwane eLimpopo South Africa abophe indoda eleminyaka engu-21 ngecala lokuphazamisa ingcwaba likanina.
Lindoda evela esigabeni seDithabaneng eGa-Mphahlele igebhe ingcwaba likanina owabhubha ngomnyaka ka 2001 yathatha amathambo yahamba lawo emzini wayo.
Kusukela lapho kubikwa lindoda ibihamba ithwele amathambo kanina ithi ayinika inhlanhla njalo ayayivikela kikho konke okubi.
Utshele amapholisa ukuthi waqala ukugebha ingcwaba likanina nyakenye ngenyanga kaMpalakazi waqeda ngoZibandlela.
Isikhulumi samapholisa eLimpopo uColonel Moatshe Ngoepe uthe izolo (NgoMvulo) izakhamizi zambona ebhodabhoda esigabeni ethwele ukhakhayi lomuntu zahle zagijimela emapholiseni.
UNgoepe uthe ngemva kokuthola umbiko lo amapholisa asebenza ngokunanzelela njalo bathe befika bathola amathambo omuntu ogcweleyo endlini kamsolwa bahle bambopha.
“Amapholisa aphinda athola amathambo amanengi enkomo endlini leyo.
Siphinde sathola ukuthi kwezinye izikhathi umsolwa uhamba ethwele ukhakhayi lomuntu ngesikhwama nxa esiya ezitolo kanye lamabhanga ekholelwa ukuthi kuzamvikela kuloba yiphi ingozi,” kutsho uNgoepe.
Ukuthi ukwenzelani lokho akukabi mgceke okwakhathesi kodwa ukuphenyisisa kwamapholisa kuzenza kuvele ukuthi ufuna ukukwenzani.
Umsolwa uzamiswa phambi komthethwandaba weLebowakgomo Magistrate’s Court ngecala lokuphambanisa ingcwaba. — Ubulembu