uMthunywa
Intatheli kaMthunywa
KULENDODA yeHope Fountain bucwadlana ledolobho lakoBulawayo egamule umkayo izandla zombili ngebhemba andubana izibophela. Isidumbu sayo satholakala singelanyawo.
UMbuso Sibanda okungasatholakalanga iminyaka yakhe yokuzalwa kuzwakale ukuba kumaviki amabili edluleyo waba lokungazwanani lomkakhe okwabangela ukuthi acine emgamula ngebhemba izandla zombili andubana athathe ucingo ayezibophela ebona umkakhe esethe daca phansi.
Ekhuluma lentatheli kaMthunywa uMnumzana James Hlatshwayo uthe okwenzakale koSibanda kunathiswana ngakho itiye esigabeni sabo.
“USibanda lomkakhe baxabana kuthe ngemva kweviki bexabene umlilo usungathi usubhuliwe wavukeleka wadobha ibhemba wamgamula ngebhemba izandla zombili okwabangela ukuthi aqamuke.
“Kukhanya unkosikazi wakhe waqaleka njalo okwenza uSibanda watshaywa luvalo wadobha ucingo wayazibophela egangeni ngoba esesaba ukuthi usebulele umkakhe,” kulandisa uMnu Hlatshwayo.
Omunye njalo umfakazi ongathandanga ukuqanjwa ngebizo uveze ukuthi isidumbu sikaSibanda saze sabonakala ngemva kwamalanga ambalwa njalo singaselanyawo.
“Isidumbu sikaSibanda satholakala egangeni singasela olunye unyawo njalo lesicathulo sonyawo olwalusele laso sasingekho,” kuchaza umfakazi lo.
Uthe unkosikazi kaSibanda wasala ephaphama wagijinyiselwa esibhedlela lapho alokhu eselatshwa khona.
“Asazi ukuthi abantu abadala sebekuthethe ngaphi ukulwa baphinde bavuse izikhwili njengabantwana kambe. .
“Mhlawumbe yikholokhu ukutshona abantu bekhangelene ezindlini lendlala ezikhona osekusenza balwe kanje.
Imizamo yokukhulumisana lesikhulumi samapholisa sakoBulawayo yehlule.
