uMthunywa
KULENDODA etshengisele ukungahloniphi umuzi wayo nanko phela iqhatshe idlalicatsha layo njengesisebenzi sendlini, ngakwayo.
ULatewin Katuvi uhudulele uTaraziva Samani emthethwandabawe weHarare Civil Court ethi wamhlukumeza kakhulu ngokungenisa lo, osengumkakhe wesibili emzini wabo ngudlu kanye lokuhlangana laye emacansini emzini wabo.
iPeace Order
UKatuvi ucele umthethwandaba ukuthi umnike iPeace Order.
UKatuvi ubike ukuba umkakhe waletha inina leli endlini ethi yisisebenzi esizasiza endlini kukanti wayesazi mhlophe ukuthi useqhatshe idlalicatsha lakhe esenzela ukuthi libeseduze laye.
“Indoda le ingihlukumeza njalonje emoyeni wami, angisela kuthula engqondweni yami.
“Waqhatsha intombi yakhe emzini wethu, okwenza indaba-le ibelukhuni yikuthi ubehlangana laye emacansini embhedeni wethu.
“Ngikhuluma nje uke wangitshaya ngogodo ngaze ngayaphendukela esibhedlela,” utsho njalo.
USamani kazange alandule lutho olukhulunywe ngumkakhe.
Uthe yena kahlaselanga unkosikazi nje, babevele besilwa kungakho-ke akumelanga abekwe icala yedwa.
“Ngamtshaya sibili kodwa laye wayengihlasela kungakho-ke akumelanga ngibekwe icala ngedwa,” uchaza kanje.
Umantshi uMashuvire unikeze uKatuvi iPeace Order njengokucela kwakhe.
