uMthunywa
YiNtatheli kaMthunywa
KULENDODA eleminyaka engu-47 yakoBulawayo ebotshwe ngoMgqibelo ebusuku kulandela ukudubula abantwabayo abathathu ngengozi.
Indoda le (igama ligodliwe) ehlala bucwadlana ledolobho lakoBulawayo eHope Fountain, kubikwa yayike yadubula phezulu ixotsha abantu abasebesenza umsindo edilini ayaliqoqile esitolo sayo.
Isikhulumi samapholisa elizweni uAssistant Commissioner Paul Nyathi uthe indoda le yathatha isibhamu sayo somhlobo we-9MM CZ pistol yadubula ngesikhathi kuledili.
Isikhulumi kasizange sithande ukuchaza ukuthi abantwana balimele okunganani kodwa sithe batshaywe zinhlamvu.
“Isiga lesi senzakale mhlaka 28 Lwezi lapho enye indoda eyayiledili elilabantu abangu-35. Ngehola lika-11.30PM abantu ababezijabulela baqala ukulwa,” kutsho uAsst Comm Nyathi.
Indoda le yayidubula emoyeni ukuze abantu babaleke beqonda endaweni ezitshiyeneyo.
UAsst Comm Nyathi uthe ngemva kokuxotsha abantu, indoda le yahamba emzini wayo yikho lapho okwenzakala khona ingozi le.
“Esexotshe abantu wahamba endlini yakhe labantwabakhe omunye oleminyaka emine, 12 kanye le-13 njalo kukhanya wadonsa isibhamu ngephutha uhlamvu lwagiqika phansi lwalimaza abantwana. Abantwana bagijinyiselwa esibhedlela seUnited Bulawayo Hospitals njalo wabotshwa,” kutsho uAsst Comm Nyathi.
Uthe indoda le isolwa ngamacala amabili elokudubula kanye lelokweqa imithetho ebekiweyo eyeCovid-19.
