uMthunywa
YiNtatheli kaMthunywa
KULENDODA yeNyanga ezibulele ngokuzihilela ngemva kokuba ibulele umkayo kunye labantwana abathathu ensukwini ezisanda kwedlula.
Amalunga emuli aveze ukuba uEdward Chirombe oleminyaka engu-43 ubulele umkakhe uJoice Mashenu kunye labantwana ngesihluku.
Kuzwakale ukuba uChirombe usebenzise isikhali esingaziwayo ukuhlasela umkakhe kunye labantwana abangamantombazana ababili oleminyaka engu-14 lole-8 kunye longumfana oleminyaka engu-12.
“Wabulala umkakhe kunye labantwana qede walala lezidumbu zabo endlini. Safika endlini yakhe ngemva kokwenza impicabadala le kodwa kazange avume ukuthi kungene ngitsho lomuntu oyedwa endlini. Sonke sisakhakhamele,” kutsho umnewabo kaEdward uNicholas Chirombe.
Isidumbu sika Edward sitholakale ngoLwesihlanu endaweni engathi kusentabeni esigabeni seNgaasekwe Mugomba ngaphansi kwenduna uHata.
Isikhulumi samapholisa elizweni siqinisekise ngesehlakalo lesi andubana achaze ukuthi amapholisa asadingisisa ngesizatho sesenzo sikaEdward sokubulala.
“Amapholisa adingisisa ngendoda okuthiwa nguEdward eyabulala umkayo kunye labantwana abathathu andubana izibulale esigabeni seNgaasekwe Mugomba eNyanga.
“Izidumbu zatholwa ngamapholisa ngemva kokuba esinye isihlobo simangale ngendaba le. Izidumbu zazisendlini. Okwakhathesi sidingisisa ngembangela yesenzo lesi esitshwaqisa umzimba.”
