uMthunywa
Thokozile Mbedzi
KULENDODA yelokitshini leMakhandeni koBulawayo etshiye izakhamizi zizidla amathambo engqondo kulandela ukuzwa ukuba ibhinye indodana yayo eleminyaka engu-9 yokuzalwa.
Indoda le, eleminyaka engu-39 yokuzalwa igama layo siligodlile ngenhloso yokuvikela umamangala, kubikwa yenze ukuganga lokhu ngenyanga kaNtulikazi.
Isikhulumi samapholisa koBulawayo ulnspector Abednico Ncube uthe bachwayisisa ngodaba lwendoda ehlukuluze umntanayo ongumfana.
“Kulendoda eleminyaka engu-39 ebambe indodana yayo iganyavu. Kukhanya ngalolosuku ngenyanga kaNtulikazi umetheswacala wafika endlini edakiwe walala lomamangala embhedeni.
“Kubikwa waqala ukuvula umakhalekhukhwini wakhe wamtshengisa imifanekiso yabantu abangagqokanga andubana ilaye umntwana lo ukuthi engaze ahlaba umkhosi, wasemkhulula izigqoko wamhlukuluza.
“Ngelanga elilandelayo indoda le, ngehola lika 8 ebusuku yaphinda yamhlukuluza emacansini futhi. Kuthe ngekhefu likaNcwabakazi umamangala waya ekhaya kunina lapho afika wamlandisela udaba lolu. Udaba lolu lubikelwe amapholisa mhlaka 28 Mpandula ngunina kamamangala,” kulandisa uInsp Ncube.
Isikhulumi samapholisa siveze ukukhathazeka ngokwanda kwamacala okuhlukuluzwa kwabantwana.
“Njengamapholisa siyakhathazeka ngoba inengi lamacala okudlwengula enzakala ebantwaneni adalwa yizihlobo. Uzulu ukhuthazwa ukuthi aphangise ukubikela amapholisa amacala okudlwengula.
“Sikhuthaza abazali ukuthi bavikele abantwababo hatshi ukuthi bavule amathuba angabafaka engozini zokudlwengulwa ngoba loba ngubani engamhlukuluza umntwana,” kuphetha ulnsp Ncube.
