Thokozile Mbedzi
KULENDODA yeMasvingo okubikwa ibhaxabule yaze yabulala enye ngoba ithethise umkayo.
UTaurai Marozvi Mabisvo oleminyaka engu-34 yokuzalwa wakuVillage 13B Mkhosi Resettlement khonale eMasvingo wetheswa icala lokubulala uEnerst Chakauya oleminyaka engu-43 ngoMgqibelo odluleyo esola ukuthi uthethise umkakhe.
Loba kungavezwanga ukuthi uErnest wathethisa wathini umkaMabviso okuyikho okwamenza wathukuthela waze wamhlasela wambulala.
Omele isikhulumi samapholisa eMasvingo uAssistant lnspector uLorraine Ndlovu ubikele uMthunywa ukuthi kwaba lengxabano phakathi kwamadoda la womabili ngoba kuthethiswe unkosikazi kametheswacala.
“UEnerst Chakauya kubikwa waxabana lonkosikazi kaTaurai Marozvi Mabisvo okuyikho okwadala ukuthi ababili laba bacine besilwa.
“UMabviso ngokuthukuthela wadobha ugodo watshaya uEnerst ekhanda wawela phansi watshayeka kusitofu okuyikho okwabangela ukuthi edlule emhlabeni,” kutsho uAsst Insp Ndlovu.
“Amapholisa axwayisa uzulu ukuthi nxa kulengxabano bangaze basebenzisa udlame kodwa kabadinge ezinye indlela zokukhumisana umlotha hatshi ukufaka umthetho ezandleni zabo.”
Uphethe ngokucela labo abalolwazi ukuthi uMabviso ungaphi babikele amapholisa aseduzane labo ukuze abotshwe.
