Uncategorized

Indoda (58) ilumathise utshani yajikela ingane (5) emlilweni

08 Feb, 2024 - 00:02 0 Views
Indoda (58) ilumathise  utshani yajikela ingane (5) emlilweni

uMthunywa

  Thokozile Mbedzi 

KUDABA olutshwaqisa umzimba kulendoda yeMachaya eZaka okubikwa ilumathise utshani bokufulela obebufakwe emkulwini andubana ithathe umntwana oleminyaka emihlanu imphosele phakathi komlilo okubangele ukuthi afe.

Insindabaphenduli le yenzakale ngoLwesibili kuviki ephelileyo ngehola lesine ilanga selisiya ngomtsha wendoda.

Kubikwa uTrust Masara oleminyaka engu-58 yokuzalwa ufike walumathisa utshani obebusendlini andubana aphakamise uMorgan Mashava oleminyaka engu-5 amphosele emlilweni watsha waze wafa.

Ekhuluma lentatheli kaMthunywa uInspector Kudakwashe Dewa uthe kulomntwana oleminyaka emihlanu ofe ngesihluku eZaka.

“UMorgan ubedlala labanye abafana, omunye uleminyaka engu-9 lomunye njalo oleminyaka engu-7 ngesikhathi ugogo wabo uSakina Nguruvhe (54) esebenza emasimini aseduzane lekhaya.

“Umetheswacala wafica abantwana bezidlalela wathatha ukhuni eziko wangena lalo emkulwini olotshani phakathi wabutshisa.

“Sebusitsha utshani wabiza abantwana ababedlala wathi bangene endlini leyo elotshani obutshayo. Abakhulu ababili bacela ezinyaweni kwathi lo omncane wasala wahle wamgola wamjikela phakathi emlilweni,” kulandisa uInsp Dewa.

Kubikwa ugogo lomunye ayelaye emasimini bebona kuthunqa intuthu ekhaya bagijima baqonda kuleyondlu ukuze bayedingisisa ukuthi uvelela ngaphi umlilo.

Ekufikeni kwabo bezwa uMorgan ehlaba umkhosi babiza omakhelwane ukuze babancedise ukucitsha umlilo njalo bancede loMorgan kodwa ngesikhathi bemkhipha wayevele esetshile futhi esehitshwe yintuthu.

Wagijinyiselwa eManjolo Clinic lapho afika wadluliselwa eMsiso Mission Hospital lapho adlulela khona esenikwe umbheda.

Indaba le yabikelwa amapholisa.

“Amapholisa axwayisa uzulu ukuba labo abahlala labantu abangaphilanga kuhle engqondweni babase esibhedlela njalo babancedise ukunatha imithi yabo ngendlela abatshelwe ngayo ngabezempilakahle,” kuphetha uInsp Dewa.

Share This:

Sponsored Links