uMthunywa
Blessing Moyo
KUDABA olutshiye izakhamizi zeMaveni koChiundura ngaphansi kwenduna uGambiza zizidla amathambo engqondo kulendoda eleminyaka engu-42 yokuzalwa okubikwa idlwengule omunye untombazana yabuye yazama ukumbulala, uMthunywa ukuzwile lokhu.
Kubikwa umamangala oleminyaka engu-20 wayesiyatheza inkuni lomzawakhe mhlaka 29 Mabasa ngezikhathi zemini yantambama lapho abahlangana lometheswacala uDanisa Sifanjani abakhuluma laye bangazwani enkulumeni kwacina kudala ukuba ababili laba baxabane.
USifanjani kubikwa lokhu kwamcunula wahle wakhipha ingqamu wamethusela andubana amdlwengule.
Umetheswacala wathi eqeda ukudlwengula umamangala wamgwaza kanengi umzimba wonke andubana anyamalale egangeni.
ingqamu
Umamangala wadojwa ngowayezidlulela wamgijimisela esibhedlela seGweru ngaphambi kokuba adluliselwe esibhedlela esikhulu seMpilo koBulawayo.
Isikhulumi samapholisa eMidlands uInspector Emmanuel Mahoko ubike ukuba udaba lolu selufikile ehofisini yabo.
“Sichwayisisa ngodaba lwendoda eleminyaka engu-42 yokuzalwa yeMaveni eGweru eyadlwengula omunye untombazana yabuye yazama ukumbulala.
“Umetheswacala usesezandleni zamapholisa. Sixwayisa uzulu ukuba bangasebenzisi udlame ekuxazululeni izinkinga njalo bengabambi izikhwili nxa sebehlukene,” kuphetha uInsp Mahoko.
