uMthunywa
Blessing Moyo
INHLANGANISO ebona ngezokulima eye-Agritex ikhuthaza abalimi ukuba balime ikhabitshi ezivandeni zabo njalo babone ukuba bayayivikela emikhuhlaneni etshiyeneyo.
Abalimi abalime ikhabitshi kumele babone ukuthi isilimo sabo kasihlaselwa yimikhuhlane ukuze bathole isivuno esihle.
Ekhuluma loMthunywa uNkosazana Treggy Mpofu onguHorticulture Specialist esabelweni seMatabeland uthe isikhathi sokulima ikhabitshi ngesomqando kodwa umlimi engayilima laloba yisiphi isikhathi.
INHLANGANISO ebona ngezokulima eye-Agritex ikhuthaza abalimi ukuba balime ikhabitshi ezivandeni zabo njalo babone ukuba bayayivikela emikhuhlaneni etshiyeneyo.
“Isilimo esesihlaselwe ngamawemusi la silakho ukubuna sitshe, sicine sisifa.
“Kulentwala njalo ezibizwa ngokuthi ngama-aphid green okuyizibungwana ezincane ezimhlophe ezibakhona emahlamvini ekhabitshi ezenza amahlamvu agoqeke njalo lapho eziyabe zikhona ziyabe zitshiye kungathi ngamanzi alunama,” kuchaza uNkszn Mpofu.
Abalimi bakhuthazwa ukuthi bafafaze imithi ethile nxa bebona ukuba izilimo zabo sezihlaselwe yimikhuhlane.
“Ukuze isilimo sakho singahlaselwa ngama-cabbage worms loopers kumele ufafaze ikhabitshi yakho ngomuthi obizwa ngokuthi yi-dipel. Okunye njalo umlimi ukhuthazwa ukuba ahlale efafaza ikhabitshi yakhe ngemithi ukuze ihlale ivikelekile emikhuhlaneni etshiyeneyo.
uNkosazana Treggy Mpofu onguHorticulture Specialist
Ukuze ikhabitshi ikhule kuhle umlimi kumele asebenzise umvundiso wohlobo lwe-Compound S njalo imele ifakwe ngemva kwamaviki amathathu ihlanyeliwe. Kuqakathekile ukuba umlimi afake iCompound C. Umlimi engasebenzisa laloba yiwuphi umhlobo womvundiso kodwa kumele abone ukuthi umvundiso lowo uleBoron.
