Indlela zokunakekela amatamatisi

19 Mar, 2020 - 00:03 0 Views
Indlela zokunakekela amatamatisi Umlimi kumele abone ukuthi uyanakekela izilimo zakhe njalo abelolwazi lokuthi alwise njani imikhuhlane ukuze angalahlekelwa yinzuzo yakhe

uMthunywa

Joel Ndlovu

ABALIMI sebekhuthazwe ukuthi bafunde indlela zokuvikela amatamatisi emikhuhlaneni lasezibungwini ukuze bangalahlekelwa yinzuzo yabo.

Ekhuluma lentatheli kaMthunywa uNtandoyenkosi Ndhlovu onguAgricultural Economist kunkampani yeWorld Shakers Investments uthe kunengi okungabulala amatamatisi okumele abalimi babekwazi.

“Ukhula ngolunye olungaphambanisa amatamatisi. Nxa kungaba lokhula lapho ohlanyele khona amatamatisi kuyaphambanisa ukukhula kwawo ngoba luzabe luqedela amatamatisi ukudla.

“Ngenxa yalokhu umlimi kumele ahlale ehlakula ukuze alukhuphe emasimini ukhula. Lakho nxa uhlakula ungaze wasebenzisa izikhali ezigebha zisiyaphansi ngoba ulakho ukulimaza impande zamatamatisi, impande zingafa lesilimo sakho laso siyafa,” kuchasisa uMnu Ndhlovu.

“Ama-red spider ayabulala amatamatisi njalo agcwala kakhulu ngesikhathi okukhudumala khona, umlimi kumele ananzelele ukuthi kahambahambi kakhulu lapho ahlanyele khona amatamatisi ngoba ulakho ukuthwala izibungu lezi  ngempahla zakhe evela ensimini ehlaselwe ngama-red spider esiya kwenye engelawo.

“Umlimi angakwenza yikuthi asiphune amatamatisi  asehlaselwe ngama-red spider awatshise. Ukufafaza ngemithi ngeyinye indlela yokuvikela isilimo sakho ezibungwini ezilemikhuhlane eyibulalayo,” kulandisa uMnu Ndhlovu.    

Uqhubeke esithi ukuhlanyela ihanyanisi kuyaphathisa ukuxotsha izibungu ngenxa yomnuko wayo.

“Intwala eziba sematamatisini ziyawabulala. Umlimi angahlanyela ihanyanisi ukuze ixotshe izibungu kumbe athelele kakhulu ensimini yakhe ngoba intwala lezi kazithandi ukuhlala endaweni emanzi.

UMnu Ndhlovu uphethe ngokuthi kusiya ngokutshisa langokuqanda amatamatisi ahlaselwa yimikhuhlane etshiyeneyo njalo eminengi, umlimi kumele abone ukuthi uyanakekela izilimo zakhe njalo abelolwazi lokuthi alwise njani imikhuhlane ukuze angalahlekelwa yinzuzo yakhe.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds