uMthunywa
Listen Ndlovu
ABALIMI baxwayiswa ukuba balime ikhabitshi ngoba ngesinye sezilimo esingakhethi mkhathi.
Omunye umlimisi wekampanini yeFarm and City koBulawayo uMnumzana Mandlenkosi Tshabangu uthe abalimi bengenelisa ukutshaya inala nxa bengalandela imithetho yokulima ikhabitshi kuhle.
Uveze ukuba ikhabitshi ingalinywa ngesikhathi sentwasa-hlobo ukuze ivunwe ngesikhathi sehlobo kumbe ilinywe ihlobo selisiya emaphethelweni ukuze iyevunwa ebusika kumbe ekwindla.
Uthe ofisa ukulima ikhabitshi kumele adinge i-2kg yenhlanyelo yekhabitshi eyenela ihekitha eyodwa.
Uqhubekele phambili esithi imifolo okulinywa khona ikhabitshi kumele yehlukane nge-12 kusiya ku-14 inches kusiya ngobukhulu bekhanda layo ikhabitshi leyo.
Uthe ubunengi bamakhabitshi lokwehlukana kwawo emfolweni yikho okutshengisa ukuba umlimi nxa esevuna uzavuna amakhabitshi amakhulu okunganani loba amancane.
“Amakhabitshi angaba seduze duze aba mancane yikho sisithi kumele atshiyelane isibanga. Sithi thina ikhabitshi nxa ilinywa imfolo kumele yehlukane nge 600 kusiya ku-700mm, kuthi amakhabitshi abesetshiyana nge-450mm emfolweni.
Amakhabitshi amancane wona atshiyana nge-600 le-300mm,” kutsho uMnu Tshabangu.
Uthe okunye okubalulekileyo ukuze isivuno sibe sihle umlimi kumele afake isilimo sakhe umquba abuye afake njalo lefethalayiza.
Ifethalayiza kumele ifakwe ngemva kokuhlola umhlabathi kwabonakala ukuba yiwuphi umhlobo wefethalayiza olungele lowo mhlabathi.
Ihekitha elinywe ikhabitshi idinga i-200 kusiya ku-500kg yefethalayiza ye-nitrogen. Ifethalayiza le ifakwa ngezikhathi ezitshiyeneyo ekuqaleni kufakwa i50 kusiya ku 60 phesenti kungakahlanyelwa, lapho kuyabe kuhlanganiswa ifethalayiza ye-phosphorus le-potassium.
Ngemva kwamaviki amabili kumbe amathathu kubuye kufakwe eseleyo.
