uMthunywa
Joel Ndlovu
UMSINDO ubangela ukuthi inkukhu zikhathazeke kakhulu emoyeni zicine zingasadli kwenze umlimi angatholi inzuzo ayikhangeleleyo.
Inkukhu zidinga ukuphathwa kuhle njalo akumelanga zibangelwe umsindo emini lasebusuku ngoba zifuna ukuthula.
Ekhuluma lentatheli kaMthunywa uNkosikazi Agnes Ndebele oyingcitshi kwezokulima lokufuya inkukhu esabelweni seMatabeleland North ukhuthaze abalimi ukuthi bagcine inkukhu zabo endaweni ezingelamsindo ezithuleyo.
“Nxa ufuna ukufuya inkukhu qala udinge indawo engela msindo njalo nxa kudingeka ubhodabhode epulazini lakho uzwe imisindo ekhona lokuthi ivela khatshana okunganani ukuze ukwazi ukubona ukuthi ingabangela na ukungahlaliseki enkukhwini zakho.
“Imitshina yakho oyisebenzisa lapho ogcina khona inkukhu kumele ukhangele ukuthi akusiyo mitshina ebanga umsindo omnengi kakhulu ongahlukumeza inkukhu zakho. Lokhu ngitsho ngoba kulemitshina yomoya enza kube lomoya olungele inkukhu, kwesinye isikhathi iyenza umsindo inkukhu zigcine sezihlukumezekile zingasadli,” kuchaza uNkkz Ndebele.
Uqhubekele phambili esithi ukuthenga imitshina eyenza umsindo omncane kungcono kakhulu.
“Ukulungisa imitshina efileyo lapho okulenkukhu khona kubi, kungcono ukuthi uzisuse uzise kwenye indawo uziphendukise usuqedile ukulungisa ngoba kungazenzela umsindo.
“Izisebenzi zakho kumele uzifundise ukuthi zihloniphe izikhathi zenkukhu zokuphumula lezokulala njalo kumele zibekwazi ukukhulumisana kuhle zingabangi umsindo ngoba kwesinye isikhathi zicina zitshingelana loba zihlekela phezulu okuyikho okuzabe sekubangela inkukhu umsindo,” kutsho uNkkz Ndebele.
UNkkz Ndebele uphethe ngokuthi inkukhu nxa zilapho okulomsindo khona kazidli kuhle njalo ziyahlukuluzeka emoyeni zicine zisethuka besezisifa umlimi acine engasatholi inzuzo ekade eyikhangelele.
