uMthunywa
Listen Ndlovu
UMLIMI kumele agcine umumbu wakhe ngendlela efaneleyo ngemva kokuwukhipha engalaneni ukuze ungaphangisi ukuphehlwa.
UProvincial Agritex Officer wesabelweni seMatabeleland North uMnumzana Dumisani Nyoni uxwayise abalimi mayelana lendlela yokugcina umumbu okhitshwa engalaneni.
Dumisani Nyoni
“Umumbu ungavunwa uyafakwa engalaneni kusenzelwa ukuthi wome usale usulobumanzi obungaba yi-12,5% ukwenzela ukuthi ungawomi,” kutsho uNyoni.
Ubike ukuba zinengi indlela umlimi angazisebenzisa ukuhulula umumbu wakhe awukhiphe engalaneni.
“Nxa elomtshina wokuhulula engasebenzisa wona loba ehulule ngezandla ebize ilima.
Ukubhula kudala ukucacadeka komumbu loba abanengi bejayele ukubhula.
Nxa umlimi elomumbu omnengi angenelisa ukuqhatsha umtshina wokuhulula,” kutsho uNyoni.
“Abalimi bayakhuthazwa njalo ukuba lapho abahululela khona bafake amasaka loba iseyili ukuze umumbu ungabi lenhlabathi, ingcekeza kumbe ukhethe.
Engahululela endlini, phandle kumbe esizeni.
“Umumbu ungahululwa umlimi kumele awele akhiphe ingcekeza enjengeziqu, amahlanga lotshani,” kutsho uNyoni.
Ukhuthaze njalo ukuba abalimi bathenge umuthi wokuvikela ubudli.
“Ukuze kuvikelwe ubudli kungasetshenziswa iShumba Plus.
Imithi le isebenza ngezikhathi ezitshiyeneyo, ikhona esebenza inyanga ezingu-3, omunye usebenza inyanga ezingu-6, omunye usebenze okwenyanga ezingu-9.
Umlimi kumele afake okuhambelana lokuthi ufuna ukuwusebenzisa nini umumbu wakhe.
“Okunye umlimi okumele akwenze yikuqinisekisa ukuba isiphala sihlanzekile ngokusithanyela abuye asigudule.
Abuye ahlole ukuthi asinetheli.
“Esiphaleni kufakwa umumbu ofakwe umuthi kuvalwe ngci kungangeni moya, lamagundwane.
Ngemva kwenyanga ezintathu umlimi uyavula isiphala sakhe ayele umumbu, athanyele isiphala afake njalo umumbu abesevala ngci,” kutsho uNyoni.
