uMthunywa
Thokozile Mbedzi
ILOKHU ithithibele imuli yakoSibanda eBethel eGwanda kulandela ukungenelwa yizigelekeqe ezihlomileyo zatshontsha imali yamalobolo eyedlula i-R50 000 leUS$700 ngeviki ephelileyo.
Kubikwa uMnumzana Mzingaye Sibanda lamanye amalunga emuli le, bahlaselwe ngoguluva akade begqoke ingowane ezimnyama ebusweni.
UMthunywa uzwe ukuthi oguluva laba bafika bamisa imota yabo bucwadlana lomuzi wakoSibanda behlome ngombhobho womhlobo lwe-pistol. Kubikwa bathi sebesendlini bathi bafuna imali yonke yamalobolo bayinikwa njalo ngenxa yokwesaba baze banikwa lenye ababeyigcine endlini.
Kubikwa oguluva laba bathola iR47 500 kubazali bentombi leUS$400 baphinda njalo baya lapho obekudlalelwa khona umcimbi emini bathatha iUS$300, R3 000 le RTGS$1 900 badliwa ngumswenya.
Ekhuluma lentatheli kaMthunywa omunye wabomakhelwane uMnumzana Nkosiyabo Moyo uveze ukuthi akalankani ngesiga esehlele omakhelwane bakhe.
“Silesithuli silapha njengezakhamizi zalapha ngokwehlele omakhelwane bethu. Sitshone sizijabulela komakhelwane kulotsholiswa kanti asibuzanga elangeni sizahlaselwa ebusuku.
“Izigebengu zakhona zithintithe yonke imali ngoba abazali bentombi ngemva komcimbi babuyela emzini wabo lapho abafika bahlaselwa bathathelwa iR47 000 kunye leUS$400 ngoba enye imali yayisiyabelwe izihlobo,” kulandisa uMnu Moyo.
“Ngemva kwalokhu baphinda njalo baya emzini lapho okwakwenzelwe khona umcimbi bayahlasela bathatha iUS$300, R3 100 leRTGS$1 900 batshaya phansi ngemota,” kutsho uMnu Moyo.
Omunye wezihlobo ongathandanga ukuqanjwa ngebizo uthe bona balesithuli ngesiga lesi ngoba akulamuntu ongaba kwazi ngokuba kube lomcimbi kungakho indaba le ingabe ikhitshwe ngomunye wamalunga emuli ebizolobola kanye lebilobolisa.
“Akulamuntu ongabakwazi ngokuba kobani kwenzakaleni. Kutsho ukuthi ukhona obekwazi ngamalungiselelo omkhwenyana wethu ukuba uzazo lobola. Kulomuntu obe lomona ngoba ebona abantwana benze into enhle. Sithemba abomthetho bazaphanga bababophe,” kutsho omunye wezihlobo ongathandanga ukuqanjwa ngebizo.
UMsekeli wesikhulumi samapholisa elizweni uChief Superintendent Blessmore Chishaka uvumile ukuthi kulemuli yeBethel eyahlaselwa yizigebenga.
“Sisachwayisisa ngezigebenga ezihlasele imizi emibili lapho okwakulele amalunga emuli. Omamangala bamukela imali yamalobolo andubana bahlaselwe yizigebenga ebusuku batshontshelwa imali le. Sicela ongabe elolwazi ngezigelekeqe lezi ukuthi abikele amapholisa aseduzane laye,” kuphetha uChief Supt Chishaka.
