uMthunywa
YiNtatheli kaMthunywa
AMAQEMBU womdlalo kanobhutshuzwayo kuleli alokhe esilwa lenhlanganiso yeZimbabwe Football Association (Zifa) kubangwa ukuphuza kwemali ephuma esikhwameni sokusiza amaqembu ngalesi isikhathi segcikwane leCovid-19.
Sekutshove amalanga kungezwani phakathi kweZifa lamaqembu, osekubangele ukuthi kungacaci ukuthi ukunikezwa kwemali le kwenziwa njani.
Ekuqaleni iZifa yayithembise ukuthi izanikeza limali ngokuphangisa kodwa yatshintsha ingqondo ngokuphangisa ibika ukuthi izafuna isikhathi.
Umongameli weZifa uFelton Kamambo usolwe kakhulu ngokwekela inhlanganiso yakhe itshaphaza ukuphuma kwalimali.
Amaqembu akumaligi angaphansi, ikakhulu ku-Division One kusiyaphansi asebunzimeni bokuthi mhla isiyaphuma limali, izabe ingasathengi lutho.
Lamaqembu amantombazana akhala ezimathonsi.
“Imali le lapha ezabuya khona izabe ingasathengi lutho. Lakhathesi asazi lutho ngayo limali,” kutsho esinye isiphathamandla seqembu elikuligi enkulu yamantombazana.
Esinye isikhulumi seqembu elikuPSL sithe iZifa isifune ukuvusa impi ngokuthula ngohlelo lwemali.
“Imali le izadala inkulumo ngoba akwaziwa ukuthi izaphuma nini.”
Isikhulumi seZifa uXolisani Gwesela utshele iphephandaba likazulu kuliviki ukuthi amaqembu angakhalazi kakhulu ngoba uhlelo luzaqhutshwa kakuhle.
IZifa yayibike ukuba amaqembu ePSL azabelana iUS$390 197, okutsho ukuba iqembu linye ngalinye lizathola iUS$5 000 kodwa imali le izabe isitshintshelwe kudola leZimbabwe.
Imali le iyingxenye yosizo oluvela kunhlanganiso ephethe inguqu umhlaba wonke iFifa kanye leConferation of African Football (Caf), njengemizamo yokuncedisa umdlalo wenguqu ngesikhathi segcikwane leCovid-19.
Umdlalo wenguqu kuleli umisiwe ngenxa yeCovid-19, osekubangele ukuthi abadlali bengaholi nanko amaqembu aphila ngemali ezivela kubabukeli bemidlalo enkundleni.
Kuthe kuphume umbiko walimali, kuvele ukuthi iqula lenkokheli yeZifa lifuna ukuthi linikeze amathimu lengatsha zayo isilinganiso semali yakuleli, ikakhulu iReal Time Gross Settlement (RTGS).
Amaqembu agcizelela ukuba angeke kwenzeke ngoba ayifuna limali injalo.
Isikhalazo esikhulu kumaqembu yikuthi iRTGS yimali ephuka amandla ingakasebenzi ngakho isipho seFifa akumelanga sitshintshelwe kuloluhlobo lwemali.
