uMthunywa
Thando Dube
KULANDELA ukumemetheka kwembiko kunkundla zokuxhumana zokuba kulabantu abangamatshumi amabili asebefile ngemva kokuhlaselana kwabomakorokoza beVova Mine bucwadlana leColleen Bawn eGwanda ngamahloka kanye lamabhemba bebanga imigodi yokwemba igolide, sokuvele ukuthi kufe umakorokoza oyedwa kwathi abahlanu balimala kakhulu njalo balalisiwe ezibhedlela ezitshiyeneyo, uMthunywa uyakuveza lokhu lamhlanje.
Kuzwakale njalo ukuthi abalitshumi lanye babotshiwe njalo bakhangelelwe ukumiswa emthethwandaba weGwanda.
Eminye imbiko ebikade imemetheka ibiveza ukuthi kulabantu abangu-200 ababotshiweyo kulandela izimpi zemigodi lezi kodwa sokuvele ukuba konke lokhu kungamanga.
Isikhulumi samapholisa esabelweni seMatabeleland South uInspector Philisani Ndebele uthe kuliqiniso ukuthi kulavuke impi yemigodi yokwemba igolide eVova Mine kodwa kulomuntu oyedwa ofileyo.
“Samukele umbiko wokuthi kulabomakorokoza beVova Mine abalwa ngezikhali ezigoqela amahloka, amabhemba, induku kanye lengqamu mhlaka 8 Mfumfu kubangwa indawo zokwemba igolide.
“Kuzimpi lezi kufe umuntu oyedwa uDumisani Ncube oleminyaka engu-28 yokuzalwa njalo abahlanu balimele. Abathathu babo okuyibo abalimele kakhulu balaliswe esibhedlela seUnited Bulawayo Hospitals kukanti ababili balaliswe esibhedlela seGwanda,” kuchaza uInsp Ndebele.
Uphinde wathi omokorokoza abalitshumi lanye babotshiwe kulandela ubudlwangundlwangu lobu.
“Sokubotshwe omakorokoza abangu-11 ngecala leli njalo bayancedisa ukuchwayisisa kabanzi ngalesisehlakalo. Bazamiswa emthethwandaba kuyonale iviki.
“Sikhuluma nje ubudlwangudlwangu kuleyondawo sobehlile,” kuphetha uInsp Ndebele.
