uMthunywa
Bongani Ndlovu
ZIBAMBE oluphuphumayo izakhamizi zeCowdray Park ngemva kokuba amanye amadoda ephose aqedana kubangwa i-speaker lomfazi ensitha.
Isiyaluyalu lesi kubikwa senzakale ngoMvulo kuyonale iviki lapho uMnumzana Patrick Sibanda (31) ephose wafela ezandleni zikaKhumbulani Moyo (28) kubangwa i-speaker letshaja yefoni okwakubolekwe nguSibanda.
Ekhuluma lentatheli kaMthunywa omunye wabomakhelwane uMnu Trust Matshiya uthe impi le yaqala kudala sibili lezakhamizi zasezikhohlwe langayo, ayisiyo ndaba ye-speaker kuphela ngoba inzondo le yayivele ikhona iphefumula phakathi.
“Amadoda la womabili kubikwa ingxabano yabo ayisiyo yerediyo nje kuphela kodwa isisusa sayo ngumkaMoyo uShiela Nkomo owayeyintombi kaSibanda ngaphambi kokuba uMoyo abuye evela eGoli bafika bathandana okwenyanga ngaphambi kokuthi baqale ukuhlala bonke njengomfazi lendoda,” kubhodla umthombo wendaba.
UMnu Matshiya ubikele uMthunywa ukuba lindaba ilukhuni ngoba uMdawini kukhanya kalwi nje ngenxa yodaba lwezinto azibolekayo kuMoyo kodwa ulwela lomfazi wakhe owathathwa nguMoyo.
“Le yindaba enzima kakhulu ngoba kukhanya angathi uSibanda yena kudala esibambile isikhwili lesi ngoba sekulemnyaka eminengi bahlukana loMaNkomo sebeze belomntwana loMoyo ofunda uGrade 1 kodwa uSibanda yena lokhe engakatholi muntu wokuthatha osokubangela ukuthi asole uMoyo ngokuswela kwakhe umfazi,” kuveza uMatshiya.
UMthunywa uphinde wathintana loMnu Moyo obikele iphephandaba likazulu ukuthi yena ubengakhangelelanga ukulimaza umngane wakhe, kusuke kwabaphambaniseka ngoba yena ubefuna impahla yakhe kumngane wakhe.
“Kusuke kwangabi lokuzwisisana okubangele ukuthi mina loSibanda sicine sesibambane ngezandla, lokho bekungenxa yokuthi mina ngithe ngicela impahla yami engamboleka yona ngeviki ephelileyo esiyatheza inkuni wangazwakali ngapha ekhulumela eceleni ngonkosikazi wami lami lokho kwangangiphathi kuhle,” kulandisa uMoyo egane unwabu.
Imizamo yokukhulumisana loSibanda yehlule ngoba wale ukukhuluma lamaphephandaba esithi akala okokutsho kuntatheli.
