uMthunywa
Ethel Ncube
ZIBUKELE ibhayisikopo yamahala izakhamizi zeChipale eBinga ngemva kokuba enye indoda ikhulule isibhakela esesabekayo yatshaya umfowabo kubangwa ikhanda lenkukhu.
Isehlakalo lesi senzakale ngeviki ephelileyo lapho uEmmanuel Bango athuze umnewabo uMnumzana Tedius Nleya kubangwa ukuba udle isitshebo wamtshiyela ikhanda lenkukhu.
Ekhuluma loMthunywa elinye ilunga lemuli le, uNkosazana Marian Nleya uveze ukuba lokhe belesithuli ngokulwa kwababili laba.
“Lakhathesi angilankani ngabafana laba ukuba bebengaze babambane bebanga ikhanda lenkukhu kuphela. Sabamba oluphuphumayo kodwa sebeke badlephana hatshi kancane.
“UEmmanuel wayehambe ukuyaxotshela inkomo uTedius wabuya ezokudla ukudla kwemini wasephambanisa wavula umganu ongasiwo wakhe wadobha inyama yomunye watshiya ikhanda kuphela yikho okwabangela ingxabano phakathi kwalaba ababili,” kubika uNkszn Nleya.
Intatheli ixhumane loMnumzana Elikana Moyo onguye owancedisa ukulamula ababili laba.
“Mina ngangizidlulela nje ngabona abantu begijimisana ngakibo kuluthuli ngathi kumbe bayadlala ngezwa ngomkhosi omunye sebemhlezi amadundulu. Ngafika ngabalamula ngathi baxolisane, isimanga engabalaso yikuthi ngathi ngibabuza ukuthi babangani bathi omunye udle inyama yomunye wamtshiyela ikhanda lenkukhu lodwa,” kubika uMnu Moyo.
Iphephandaba likazulu lixhumane loEmmanuel owabhaxabula umfowabo ovumileyo ukuba watshaya umfowabo bebanga ikhanda lenkukhu.
“Okwangicaphulayo yikuthi yindaba wadla esami isitshebo watshiya ikhanda, wayesithi mina ngizatsheba ngamanzi yena edle isitshebo sonke?
Okwenza ngacina ngimfaka isandla yikuthi ngathi ngibuza yena ngoba nguye owayesemkulwini ukuthi isitshebo sami likhanda kuphela wangiphendula wathi uhobo ubaleke lenyama yonke.
“Kambe uhobo kalazandla, wayengaze adle inyama yonke atshiye ikhanda? Lapho wahle wangicunula,” kubika uEmmanuel.
UMthunywa uxhumane loTedius owatshayelwa ikhanda lenkukhu owalileyo ukuba bamfaka isandla.
“Lokho okwekhanda lenkukhu zindaba ezintsha kimi, ngiyaqala ukukuzwa ngawe. Mina angazi lutho,” kuphetha uTedius.
