uMthunywa
YiNtatheli kaMthunywa
ABALIMI bendaweni ezinkulu abakhangelele ukuvuna izilimo zabo zehlobo ukuze baqalise ukulima okwebusika kumele babone ukuthi impahla yabo yokuvuna iseduzane kukanti abalimi abancane labo kumele baqale ukudinga abazabasiza ukuze umsebenzi lo ubelula.
UMgcinisihlalo webhodi ye Agricultural Rural Development Authority (Arda) njalo eyingcitshi kwezokulima uMnumzana Ivan Craig ngoMvulo ukhuthaze abalimi abakhulu ukuthi baqhatshe loba baqalise ukulungisa ama-combine harvesters ukuze baqalise ukuvuna kungavele kuthiwe isivuno sabo sesingakhutshwa emasimini.
UMnu Craig uthe ukulima kwebusika, ikakhulu ingqoloyi, kuyaqala maduze nje kungakho abalimi kumele babone ukuthi izilimo esezivuthiwe ziyasuswa emasimini ukwenzela ukuthi zingalahlekelwa luhlonzi lwazo zisemasimini.
Abalimi akumelanga bekele izilimo zabo ezisanhlamvu zome kakhulu, ngoba lokhu kuyaphambanisa kusisindo saso njalo kucina kuzibeka engozini yamasela, imlilo yendle kunye lokudliwa yizifuyo ezifohla emasimini.
Umumbu oyabe ungafikanga kuzinga elikhangelelweyo lokoma uyathengiswa eGrain Marketing Board (GMB) kodwa uyabe umele uqale wome uze ufike kusilinganiso esikhangelelweyo.
UMnu Craig uxwayise abalimi abalomumbu omnengi ukuthi bephule indleko zabo ngokuhambisa isivuno sabo ngama-trailer amagonyethi ukuze bangathengi amasaka.
“Ngithanda ukukhuthaza labo abafaka isivuno sabo eziphaleni okwesikhatshana ukuthi babone ukuba ziyangena umoya ukuze isivuno singacini sikhutha. Kumele njalo lezoziphala kube zindawo okungeke kungene amagundwane angaphambanisa uhlonzi lwesivuno,” kutsho uMnu Craig.
Uphethe ngokukhuthaza abalimi ukuthi bafafaze umuthi eziphaleni njengendlela yokuvikela ukubakhona kwempehlane kanye lezinye izibungwana ezingadla isivuno sicine siphambaniseka.
