uMthunywa
Nkosilathi Sibanda
UKUNQOBA kwelizwe leMorocco kumdlalo walo leSpain kulethe injabulo kunzalo ye-Africa, okuveze ukuthi inguqu yaleli izwekazi ilesisindo.
IMorocco yenze imbali ngokuba yilo lodwa ilizwe le-Africa elifike kusigaba sama-quarter-final kulumqhudelwano wamazwe lonyaka.
Ijabulile iAfrica.
Abadlali be Morocco bejabulela ukunqoba iSpain ngemibekwa ngoLwesibili
Kuthethe amahola amabili ukuthi iMorocco yenelise ukunqoba iSpain, idlulele kusigaba esilandelayo kunkezo yeWorld Cup.
Inqobe nge 3-0 kumbekwa.
Kwehlule ukuthi amaqembu womabili ahlohlane, okudale ukuthi zicine zikhahlela imbekwa. Unozinti wama-Atlas Lions, uYassine Bounou uphenduke waba liqhawe enkundleni ye-Education City Stadium, e-Al-Rayyan, eQatar ngemva kokuvimba imbekwa emibili.
Abalandeli beMorocco abakade besenkundleni, inengi kuyizizalwane zakulelo, babonakale sebebihla inyembezi, isitshengiselo sokuthaba. Ingena kulumkhankaso, iMorocco ibikhangelelwe phansi, nanko ilabadlali abasadinga udumo, abangela mabizo aphezulu.
Abalandeli be Morocco
Lakanye ukufika kusigaba se-Last 16 kwethusile.
Kusukela ekuqaleni komkhankaso iMorocco ibilomfutho wokunqoba, isenelisa ukudlula kumaqembu ayesatshwayo anjengeBelgium, eyanqotshwa nge 2-0 kusadlalwa kusigaba samaqoqo. Ukufinyelela kwayo kuma-quarter-final bekungekho emicabangweni yababukeli abanengi kodwa ukudeleleka kwayo kuyincedile ukuthi ifike kulesi isigaba idlala elayo ibhola.
Kumdlalo wayo leSpain, kuqale kuludaka, zombili zisehluleka ukusebenzisa amathuba. Endaweni yokuthi ibhola likhahlelwe emambuleni, abagadli bebekhetha ukuqongisa phezulu kumbe bakhuthe nje.
Ihlandla lokukhatshwa kwembekwa liveze ukuba unozinti uBounou ulengcino ezandleni.
Unozinti lo, oleminyaka engu-31 yokuzalwa, akubuzwa muntu ukuthi ngoLwesibili ntambama wenze umsebenzi omkhulu.
Umdlali weSevilla lo uvimbe imbekwa wavulela amathuba okuthi abanye bakhe uBadr Benoun u-Abdel Sabiri, Hakim Ziyach lo-Ashraf Hakimi, bahlohle ngokuzethemba.
UHakimi nguye otshaye elokucina elidanise abalandeli beSpain. Umdlali lo wakhulela eSpain, abazali bakhe bedabuka eMorocco kodwa wakhetha ukuthi amele isizwe sakhe somdabu.
Kulabo ababukele lumdlalo, bazavuma ukuthi iMorocco ike yalala emdlalweni nanko ibiphethe ilandela ibhola phose okwengxenye yomdlalo.
ISpain ibihlupha, ihlala ilalo enyaweni kodwa yehluleka ukuthi isebenzise amathuba la.
IMorocco izadibana lePortugal ngoMgqibelo.
