uMthunywa
YiNtatheli kaMthunywa
IMKAMBO ebhalisiweyo ivunyelwe ukuthi ivule amahola abekiweyo ngesikhathi somvalela ndlini wensuku ezingu-30 kukanti izimota ezithwala izilimo zizisa emkambo lazo zizabe zivunyelwa ukuthi zidlule kuzivimbamgwaqo ama-roadblocks kanye lendawo zokuhlola iCovid-19.
Ezokulima lazo kazizange ziphanjaniswe yikuvinjwa kokuqala kwenyanga kaMabasa nyakenye kuka-level 5 kumbe langesikhathi sokuvulwa ezokwembiwa lokulungiswa kwempahla. Ukungeniswa kwezilimo ezisanhlamvu kanye lokuthwala kwempahla yezokulima, imitshina yezokulima ngeke kuphanjaniswe yikuvinjwa kwabantu.
NgoMvulo, ugatsha olubona ngezoMhlabathi, Ezokulima, Amanzi kanye lokuhlaliswa kutsha emaphandleni luthe luzanikeza incwadi zokuxolela kulabo abenza umsebenzi obalulekileyo kuhlangothi lwezokulima kanti lokhu sokudluliselwe kumawofisi eAgritex, emawofisini amapholisa kanye le-Agricultural Marketing Authority (AMA) lamawofisi ogatsha lolu.
Incwadi zokuxolelwa lezi kazibhadalelwa njalo lowo ozatholakala ebhadalisa labo abafuna incwadi lezi kumele kuyebikwa emapholiseni. UMphathintambo wogatsha olubona ngezoMhlabathi, Ezokulima, Amanzi kanye lokuhlaliswa kutsha emaphandleni uAnxious Masuka ngoMvulo uthe ugatsha lolu lulomlandu wokubona ukuthi kutholakala ukudla emakhaya njalo lokuthi kulokuvikeleka kokudla elizweni; kulamanzi ahlanzekileyo, izinhlizakalo zamanzi ahlanzekileyo, ukulethwa kwempahla zokulima emkambo.
UMphathintambo uMasuka uthe ukuthwala kwezilimo zisuka endaweni ezehlukeneyo lapho okulinywa khona zisiya emkambo, ingqe labo abathwala izilimo bayabe belencwadi. Zonke izimota ezithwala izilimo zemasimini kanye leze-horticulture, izifuyo kanye lempahla etshiyeneyo yezifuyo bazabe bevunyelwa ukudlula kuzivimbamgwaqo lendawo zokuhlola iCovid-19.
UMphathintambo uMasuka unxuse bonke abakuhlangothi lolu ukuthi bagcine futhi balandele inhloso yokuvinjwa emakhaya ngokulandela imithetho yonke ukuze izisebenzi zivikelwe ekumemethekeni kweCovid-19 esithi abalimi kumele bathathe amanyathelo okuqinisekisa ukuthi izisebenzi zabo zihlala emapulazini abo kumbe zihlala endaweni eziseduzane njalo lazo ziyalandela imithetho.
Ukunikwa kwempahla yokulima ebalisa inhlanyelo, ifethalayiza, imithi, amatsiyane, ukudla kwezifuyo, ukulima, impahla yokulungisa imitshina yokulima izaqhubekela phambili itholakala.
