uMthunywa
Nkosilathi Sibanda
UMDLALI weMakhandeni Tennis Club u-Isaac Nyoni kubikwa uzamela iZimbabwe kumqhudelwano weZonal Championships mhlaka-6 kusiya ku-16 Zibandlela ngomnyaka ozayo.
UNyoni nguye yedwa umdlali weqembu lakhe ozamela ilizwe kulumncintiswano owaziwa ngokuthi yiJunior Africa Tennis Championships.
UNyoni oleminyaka engu-13 yokuzalwa, wakhethwa ukuthi aphatheke kulumncintiswano ngemva kokwenza kuhle kumidlalo yelizwe eMasvingo, Mutare kanye lakoBulawayo. Umqeqetshi wakhe e-Emakhandeni Tennis Club, uWitness Jiyane utshele iphephandaba likazulu ngoLwesibili ukuthi impumelelo kaNyoni iyibufakazi bokuthi kuyasetshenzwa kukilabhu yabo.
“Kuyimpumelelo enhle eqenjini lakusabelo sakoBulawayo. Kutshengisa ukuthi ikilabhu yethu ingelinye lamaqembu ahamba phambili eZimbabwe,” kutsho uJiyane.
UNyoni ayisuye yedwa umdlali owenze kuhle osuke eMakhandeni. Uzakuba ngowesithathu elandela uZamani Moyo osedlala eMelika, lo-Adrien Mudzire owake wamela iZimbabwe ku-Africa Junior Championships e-Mozambique. Bonke laba badlali basuka ezandleni zikaJiyane.
UNyoni ngukaputeni weMakhandeni Tennis, ngakho uJiyane ukholelwa ukuthi ukubizwa kwakhe ukuthi amele ilizwe, kuzakhuthaza labanye abadlali ukuthi benze njengaye.
“Njengokaputeni weqembu, banengi abadlali abazalandela emanyathelweni akhe. Inhloso yethu yikukhulisa umdlalo lokuthuthukisa ithenisi kwabasakhulayo. Sigxile kakhulu endaweni ezilabantu abanengi kanye lendawo ezimbalwa eziseduze kwedolobha lasemaphandleni,” kutsho uJiyane.
UJiyane uphinde wabonga abanye babaxhasi babo ababalisa iQoki Zindlovukazi kunye lesitolo esithengisa ukudla eseChicken Inn.
“Sibonga iqula leQoki Zindlovukazi ngokusixhasa ngohambo lokuya eMutare, eHarare laseGweru. Sibonge njalo leChicken Inn.”
Kusenjalo, uJiyane uthe iqembu lakhe liphezulu kohlelo lokwabela ulwazi lwethenisi esikolo seCharleston Trust Primary School.
Isikolo lesi phakathi komnyaka owodwa, sesitshengisele ukuthi sizahwatsha ingcitshi zalumdlalo.
