uMthunywa
YiNtatheli kaMthunywa
KUSUKELA ngoLwesine kuliviki akubizwa ozwayo kunkundla yezikolo kumqhudelwano wenkezo yeCOPA Coca-Cola ezancintiselwa edolobheni le-Kadoma.
Amaqembu ezikolo awabadlali abaleminyaka engaphansi kwe-15 azadibana kulinkezo enkulu kulazo zonke esifikise iminyaka engamatshumi amathathu lanye kukhalenda yezemidlalo kuleli.
Inkezo yeCOPA Coca-Cola le yasungulwa kuleli ngomnyaka ka1989 koBulawayo.
Kulumhlubulo welizwe, kuguquke izinto nanko phela sekuvuke intshantshu zikanobutshuzwayo kuzikolo zemaphandleni. Esabelweni seMatabeleland North kuhlandla labafana kungene isikolo seSobumvu Secondary. Emankazaneni kulesikolo seTohwe.
Ezansi yeMatabeleland kuzabe kulesikolo seTongwe ebafaneni kuthi isikolo seNkankezi libuthanise iqembu lamankazana.
Ukusadalala kwalesi isikolo siqabuka ukuncintisana lezinye eziphuma emadolobheni, kuyancomeka njalo labaqoqi beCOPA Coca-Cola batshayela abafundi labaqeqetshi baso ihlombe.
Kuminyaka engu-31 kuthakazelelwa linkezo, imbali yokuncintisa lokwenza kuhle kwezikolo ezibalisa iSomvubu (Mat North), Tohwe (Mat South), iSibomvu (Mat South), Chinonge (Mat South) kuphakamise isisindo somncintiswano lo.
Lakwezinye izabelo ziphaphamile izikolo zemaphandleni kulandela ukuthola kwazo ithuba lokuba yingxenye yalinkezo.
KoBulawayo sekubusa isikolo seMpopoma High ngoba okweminyaka emibili, lesi isikolo sesingene amathimu amabili kulumncintiswano.
Lonyaka siyaphinda njalo ngokubahambisa abafana lamankazana.
Okwenze iCOPA Coca-Cola yabatshazwa kwezemidlalo yezikolo yikuzinikela kwabasekeli bayo ukuphathisa izikolo ngempahla ebalisa imitshina yamanzi, izibholane, izindlu zokufundela, ucingo, lokunye nje okubikwa yizikolo ezitshiyeneyo lapho ezifuna khona usizo.
Ngomnyaka odluleyo, iCOPA Coca-Cola ifikisa iminyaka engu-30, abasekeli bayo banikeze izikolo esezaphatha linkezo kanengi isipho sengwalo, yagcizelela ukuba yenze lokho ukuze itshengise abantwana besikolo ukuthi kumele lanxa besebenzisa amathalenta abo bangalibali ukufunda ingwalo zabo.
Isikolo seMzilikazi High koBulawayo ngesinye esathola ingwalo lezi.
Lonyaka kuzavuswa uthuli lwenkundla zesikolo seRimuka 2 High lapho okuzadlalela khona amaqembu abafana. Isikolo seJameson sizaphatha imidlalo yamankazana.
UMkhokheli wenhlanganiso yeNational Secondary Heads (Nash) uArthur Maphosa ubike ukuba sebelungele ukuyavula imidlalo.
“Imidlalo yethu ka-2019 izakuba esabelweni seMashonaland West.
Silokuthaba ukuthi umncintiswano uyakhula njalo sinika isibongo esikhulu kubasekeli bethu iCoca-Cola.
“Okusithabisa kakhulu yikuphakanyiswa komntwana oyinkazana nanko phela i-COPA Coca-Cola isithe imivuzo izalingana. Yiso isiqalo sempumelelo leso.
Abantwana abangamankazana bayaswela amathuba okuzibonakalisa endaweni ezinengi, kodwa imincintiswano yenguqu enjengeCopa Coca-Cola inikeza ithuba lokuthi abantwabethu baveze ithalenta labo,” kutsho uMaphosa.
Isikhulu senkampani yeCoca-Cola uVee Chibanda uthe baqhubeka ngokuqinisa ubudlelwano babo lezikolo kanye lokuphakamisa ithalenta lenguqu kwabasakhulayo.
Abanqobi balonyaka, njengenhlalayenza, bazanikezwa ithuba lokuyamela iZimbabwe kumqhudelwano weAfrica ozahlanganisa amazwe abalisa iKenya, Uganda, Tanzania, Ethiopia, Angola, Mozambique, Zambia, Malawi, Botswana, Namibia, Rwanda, Congo, Swaziland, Nigeria leSouth Africa.
Izikolo ezincintisa ku2019:
Abafana:
A: Tongwe (Matabeleland South), Rujeko (Mashonaland Central), Vimbai (Mashonaland West
B: Hippo Valley (Masvingo), Chapwanya (Manicaland), Prince Edward (Harare)
C: Rimuka 2 (Host School), Somvubu (Matabeleland North), Mpopoma (Bulawayo)
D: Pamushana High School (Intshantshu zanyakenye), Rusununguko (Mashonaland East), Guinea Fowl (Midlands)
Amankazana:
A: Rimuka 2 (Mashonaland West), Chinyenyetu (Midlands), Nkankezi (Matabeleland South)
B: Gotora (Manicaland), Chipindura (Mashonaland Central), Mucheke (Mashonaland East)
C: Jameson (Host), Mpopoma (Bulawayo),Dzivarasekwa 2 (Harare)
D: Mwenezi (Masvingo), Nyamauru High School (defending champions), Matabeleland North (Tohwe)
