Ugwalo lulotshwe nguTommy Matshakayile Ndlovu loDoris Nomathemba Ndlovu belo Bekithemba Sodindwa Ncube.
Ludindwe yiMambo Presss
Lamhla siphindela kusihloko esisiqale ngeviki ephelileyo lapho ebesixoxa khona ngokufa, ukungcwatshwa kanye lokuzila. Siphethe sesikhuluma ngesililo esibakhona nxa sekufe umuntu omdala.
Umuntu omdala kakhulu oleminyaka engedlula kwelikhulu wayethi angagula kakhulu sekusele udokoza nje kodwa umoya ulokhu ungakaphumi njalo labantwana bakhe sebefikile bonke, kwakusenziwa imicimbicimbi ethile.
Omunye wayeze ahlatshelwe inkomo kukhunjulwa ukuthi engxenye umoya wakhe umelele yona.
Sebezamoselake isibindi kuthike angasidla aphele. Kodwa uyabe engaphelanga, ngemuva kwalokhu kwakusephulwa uthungo olusemnyango; izikhathi ezinengi kwakusithi kungenziwa lokhu aphele.
Mhla kusifa umnumzana oyabevele egula esongiwa yizihlobo zakhe zesilisa, sezimvala amehlo ukuze acimeze kuhle, zimhlalise kuhle, zimgobe amadolo ahlale aqotshame ukwenzela ukuthi angcwatshwe enjalo. Nxa kwenzeke ukuthi afe kungelabantu wayeganyulwa ukuze kuvume ukuthi ahlaliswe kuhle.
Kwakukhudunyezwa amanzi kuthotshwe amehlo ukuze avume ukucimeza. Nxa kusehlula kwakusebulwa ingxoza abotshwe amehlo.
Yikho ekufeni kuthiwa kuko goqwanyawo. Umuntu wayengangcwatshwa mhla efayo. Kwakulalwa aze angcwatshwe kusisa. Isidumbu sasibekwa ngemva kwesivalo bese kubotshelwa ingubo entungweni eziqondane lesidumbu ukuze singahlali egcekeni. Owesilisa wayelala elindwe ngabesilisa. Amanye amanina lawo ayelala labo, wona ezohlalisa inina kumbe amanina la asefelwe yindoda.
Okwakusenzelwa ukuthi umuntu angahle angcwatswe khonapho, yikuthi kuyabe kumelelwe izihlobo, lokuthi hlezi aphaphame. Abanye obaba babehlala phandle bebase umlilo. Umuntu ofelwe ngumkakhe kwakungamelanga alale umkakhe engakalahlwa. Lokhalayo kwakungamelanga akhale elele; kwakumele okhalayo akhale ehlezi ngezibunu. Nxa ezijanqa ezigiqa phansi babemvusa bamhlalise, kumbe bameyamise emdulini kodwa ahlale..
Ukuxhawula esiNdebeleni ngokomuntu othabileyo, ngakho kwakungaxhawulwa emfeni. Abantu nxa besiya esililweni babesithi bayahlanganisa amehlo. Ukuhlabela lokugida kwakusenziwa kuthatshiwe.
Ukufa kwakuhlonitshwa. Nxa kungakhalwa kwakuthulwa zwi. Ababefika, babekhala bahlabe umkhosi bakhulume lokho ababekukhuluma okunjengokuthi:
“Maye ngobaba wami! Sengizasala ngisithini? Udliwe yini?” njalo njalo Umfelokazi loba abafelokazi bona babengamelanga baphendule labo abakhala bebuza. Okwabo kwakuyikukhala nje loba bebuza eyabo imibuzo engaphendulekiyo. Nxa kufanele kuphendulwe kwakuphendula izihlobo zofileyo, bona babekhala nje bembethe ingubo, beveza amakhanda. Kwakungafanelanga kudliwe inyama lapha ekhaya umninimuzi engakalahlwa. Lo chago lalo lwalungadliwa kungaka hatshulwa umeluleko.
