Ugwalo lulotshwe nguTommy Machakayile Ndlovu loDoris Nomathemba Ndlovu belo Bekithemba Sodindwa Ncube
Ludindwe yiMambo Press
Umbuyiso
Umbuyiso ngumkhuba oyenziwayo kusenzelwa ukuthi umoya womuntu owafayo ulethwe ekhaya khona umuntu lowo ezagcina abantwabakhe. IsiNtu sikholwa ukuthi umuntu omdala engafa umoya wakhe uzula egangeni. UMbuyiso ke–wenzelwa ukuletha umoya lo ozula egangeni ekhaya.
Ngubani oyenzelwa umbuyiso?
Umuntu ubuyiswa sekuphele umyaka efile. Kuyazila ukuthi umuntu abuyiswe kungakedluli isikhathi esifika emyakeni efile. Kumele umuntu abuyiswe ngamabele asele selinywa yena esedlule.
Yisiphi isikhathi sokubuyisa?
Imbuyiso esiNtwini iyenziwa ngesikhathi sebusika abantu sebebhulile. Kumele abantu baqale babhule khona kuzatholakala amabele okupheka utshwala bombuyiso. Kunqinekwa njalo ukuthi kungaze kwenziwa imbuyiso izihlahla sezihluma, izulu seliseduze ukusewula, kumbe abantu sebephethe inhlanyelo. Lokhu ke kutsho ukuthi inyanga zokubuyisa nguNtulikazi, uNcwabakazi kucine ekuqaleni kuka Mpandula.
Amadlozi afaniswa lenyoka ngakho ngalezinyanga izinyoka zisathule ziphansi, yiso ke isikhathi sokukhuluma lazo. Ngesikhathi izihlahla ziqalisa ukuhluma izinyoka ziyakhwela ezihlahleni ziyekhatshana. Kwakunqinekwa njalo ekukhetheni usuku okuzakwenza ngalo umbuyiso. Kukhangelwa ukuthi inyanga ingaphi. Phela kakufanelanga ukuthi umsebenzi wenziwe ngelimyama. Elimyama kutshiwo mhla inyanga ifile. Kuyekelwa inyanga ithwase.
Ukuqhutshwa kombuyiso
Umbuyiso wawumenyezelwa njengomthimba. Amabele omuzi ayefanele abanjwe ngulowo ongumaphatha inkezo walapha ekhaya. Amabele abanjiweyo ngawalapha ekhaya wodwa. Ukubanjwa yikuthi kucutshwe amanye amabele ngengcebethu abikelwe kwabaphansi kuthiwe;
“Lina bakozibanibani nanku ukudla kwenu, sibuyisa umzukulu wenu, njoba lisazi ukuthi wasitshiya ngomnyaka othile”.
Nxa sekwenziwe lokhu sekuzathelwa amabele wonke azapheka utshwala emanzini. Abayizihlobo labomakhelwana labo bazapheka, bona awabo amabele athanjiswa engabanjwanga. Nxa befisa ukubikela awabo amadlozi bayazenzela emzini yabo.
Nxa utshwala sebuhluziwe buzathelwa emaqhageni alitshumi lemiqokwana emibili ezagcinelwa abaphansi, azanathwa ngabomuzi. Inani lamaqhaga lalingedlula kutshumilambili, kodwa kwakungamelanga libe ngaphansi. izihlobo labomakhelwane zaziletha amaqhaga ezithanda ukuwaletha Umbuyiso wawuthatha amalanga amathathu.
Ngelanga lakuqala, eliyilo elingelombuyiso, abosendo lezihlobo zegazi, kwakusithi ilanga selibantu bahle bathathe iqhaga kulawana okuthiwa ngawabaphansi,bayelalo engcwabeni, behamba bedonsa imbuzi emhlophe okuthiwa lihlahla. Ukuthi lihlahla libizo elisetshenziswa kubuyiswa.
