Ugwalo lulotshwe nguTommy Matshakayile Ndlovu loDoris Nomathemba Ndlovu beloBekithemba Sodindwa Ncube
Ugwalo ludindwe yiMambo Press
Siqhubeka sifunda ngokukhula (ukuthomba) kwabantwana kudaba esiphethe ngalo kuviki ephelileyo. Kuviki edlulileyo sicine lapho umntwana oyinkazana eseyekugogo wafika wakhala phambi kwakhe. Yena owayemthatha ayemlungisa. Siqala lapha okuthiwa abanye babekwenza kanje: Ugogo wayethatha umntwana ahambe laye afike adinge amadudu emvukuzane.
Angawathola kwakuthiwa unkazana lowo awanyathele aze abemabili kuthi elesithathu alisikize ebala insuku zakhe. Kwabanye kwakuthi inkazana ingathomba iphiwe imithi, iye emfuleni ihamba loninakhulu loba uyisekazi. Yayifika ihlanganise umuthi lowana legazi ibisisenza amachatha amathathu edwaleni ukwenzela ukuthi lensuku zayo zibentathu. Sekuvelwa emfuleni babethola umnewabo wentombi, uma ekhona, emi entubeni ephethe uswazana, amtswampule kathathu.
Kwakuthiwa usemtshaya okokucina, lokhu phela wayesekhulile. Okwakujayelekile yikuthi abantwana bathombe ngesikhathi somqando. Kwakuthi sekwenziwe konke lokhu okuqanjiweyo kukhethwe usuku lapho okwakuzathathwa khona amankazana wonke asanda kuthomba kuhanjwe lawo emfuleni kusekuseni kakhulu ilanga lingakaphumi.
Emfuleni lapho babehamba logogo lentombi esezathomba kudala kodwa zingakendi. Ayefika amankazana lawo abhudlukele esizibeni amanzi eqanda sibili elongqwaqwane.
Izintombi ezindala zazisima ngaphandle kwesiziba ziphethe inswazi. Lowo owayezama ukuphuma emanzini zazimuthi tswampu ngoswazi abuyele phakathi. Amankazana ayethi ehlezi emanzini ngapha ogogo bebasa umlilo omkhulu.
Related Stories:
Kwakuthi bengabona ukuthi sebehlale emanzini lapho kwanela kuthiwe kabaphume. Injongo yakho lokho kwakuthiwa yikuqinisa amankazana la. Kwakuthiwa imizimba yabo leyo imele ijayele ukumelana lobuhlungu. Lokho kwakuyikubalungiselela ubunzima ababezahlangana labo ekwendeni. Babephuma-ke esizibeni lapho bahlaliswe emlilweni lapho bakhudumale.
Yiso leso isikhathi ababelaywa ngaso beqonqoselwa ukuthi kwakuyisikhathi sokuthi sokumele baziphathe njani phambili kwabantu besilisa, baqonqoselwe njalo ukuthi nxa bengakhomba kumele baziphathe njani. Lapha kwakugcizelelwa ukuthi bengaqali ukwembatha lamajaha bengakendi. Sebesuka emfuleni babetshaya udwendwe beqonde ekhaya lapho ababesenzelwa khona idili elikhulu.
Kwakutshonwa kugidwa kudliwa. Yikho-ke lokhu okwakuthiwa yikudunduzela. Kuthiwa kumele sinanzelele ukuthi kwezinye izigaba idili leli lalisenziwa sekuphele umnyaka intombi ithombile njalo lalisenzelwa yena yedwa engahlanganiswanga lezinye izintombi.
Ngemva kwaleso sibanga intombi yayisizahlala ifundiswa ukuthi indlu iphathwa njani, indoda iphathwa njani, abantwana benzelwani njalo njalo. Kwakusaziwa ukuthi ibanga elalizalandela ngelokwenda. Kwakusadliwa ngoludala hatshi okwakhathesi.
