Ugwalo lulotshwe nguTommy Matshakayile Ndlovu loDoris Nomathemba Ndlovu beloBekithemba Sodindwa Ncube
Ugwalo ludindwe yiMambo Press
Ukubalwa kwesikhathi esiNtwini
Ukuhamba kwesikhathi kuthiwa kwavela kwadabuka kuyinto eqakathekileyo empilweni yabaNsundu. Ngakho-ke zazivele zikhona indlela okwakuqanjwa ngazo izikhathi kusukela ekuseni kuze kufike ngelanga elilandelayo, iphele iviki, iphele inyanga uze uphele umnyaka. Isikhathi kukhangelwa ilanga:
Empondozankomo: Kusekuseni kakhulu kungakakhanyi, nxa ukhangela esibayeni ubona impondo zenkomo zimhlotshana zona inkomo zingakhanyi.
Ilanga liphuma: Kutshiwo lapho ilanga lisithi catsha liyimbumbuluza ebomvu.
Ilanga selikhwelile: Amazolo ayabe esekhithika etshanini. Yisikhathi sokuphuma kwenkomo.
Imini enkulu/seliphezu kwezindlu: Isithunzi somuntu sesimi saqonda mpo. Ikhanda libesezinyaweni zakhe.
Ngemva kwemini enkulu/seliphethuli imithunzi yezindlu: Lesi yisikhathi lapho imithunzi iqalisa ukuphenduka ikhangela empumalanga.
Emabuyankomo: Isikhathi ngemva kwemini enkulu inkomo sezivela chaka zizesengwa.
Selibantubahle/Selizikhala zamithi/selisiya ngomutsha wendoda: Sekuntambama ilanga selibanga ukuyatshona selikhanya ngezikhala zezihlahla.
Inhlamvu yelanga ingakatshoni/Selimathunzi: Ilanga liyabe selibomvu selifuna ukuthi qobhi kunina.
Sekuluvilibana/Sekunqunda amehlo: Ilanga selitshonile into ebucwala isiqala ukuthi ingakhanyi kuhle.
Kusihlwa: Kuyabe sekumnyama. Yisikhathi okudliwa ngaso kusiyafika isikhathi sokulala.
Isikhathi sebusuku: Ekutshoneni kwecelankobe: Lesi yisikhathi abantu bethi kabalale. Icelankobe yinkanyezi etshona sekuhlwile.
Ukukhala kwenkukhu zakuqala: Sekusebusuku sibili.
Related Stories:
Ukukhala kwenkukhu zesibili: Sekuphakathi kobusuku. Abantu bangaphuma phandle bakhangele umthala bawufice usuphendukile.
Ukukhala kwenkukhu zesithathu/Emadabuka kusa/Ekuphumeni kwendosakusa/Ezokubuya kwabathakathi: Isikhathi sekubanga ukusa. Ukukhala kwenkukhu nxa sekuhlangana lokuphuma kwenkanyezi okuthiwa yindonsakusa kutsho ukuthi ukuphuma kwelanga sekuseduze. Lokhu kutsho ukuthi abadala isikhathi basibala besebenzisa ukukhala kwenkukhu lokuhamba kwenkanyezi ezaziwayo. Umthala uyaphenduka nxa sekuphakathi kwamabili, kuthi nxa sekubanga ukusa ube usungezansi kwesibhakabhaka.
Isikhathi kubalwa insuku: Insuku zeviki kakulula ukuthi umuntu azi kuhle ukuthi zadabuka zibizwa ngayonale indlela na, ikakhulu uMgqibelo leSonto. Kodwa izikhathi eziveza ukulandelana kwamalanga zimi kanje esiNtwini.
Kusasa: kutsho usuku olulandela olwalamuhla. Ngomhlomunye: Kutsho phambili kwakusasa. Nxa lamuhla kunguMvulo ngomhlomunye kungoLwesithathu. Izolo: Kutsho usuku olungemuva kwezolo. Nxa lamuhla kungoLwesibili kuthangi bekungeSonto.
Kuthangithangi: Kutsho usuku olungemuva kwakuthangi. Isikhathi sibalwa ngenyanga. Inyanga kuthiwa zazivele zisaziwa ngesiNtu zimi kanje siqala ekuqaleni komnyaka: 1. uZibandlela ii. uNhlolanja iii uMbimbitho iv uMabasa njalonjalo.
