Ethel Ncube
KWENZAKALE insindabaphenduli eMagama eTsholotsho ngesikhathi enye muli itshaya ithuna qede lapho kwafa oyedwa, kwaphambana ingqondo abathathu.
Bonke laba ngamalunga omdeni lo. Kubikwa ukuba phakathi kwabaphambane ingqondo, omunye wabo wavuka elele phezulu kwethuna.
Isehlakalo lesi senzakale kumaviki amabili adluleyo.
Iphephandaba likazulu lizwe ukuba ithuna ebelitshaywa ngelikaJosphat Moyo, owabhubha kuminyaka emibili edluleyo kungozi yomgwaqo. Abantwabakhe kubikwa bebezama ukuzwisisa ukuthi wafa njani kodwa besehluleka ngoba amanye amalunga omdeni lo esala.
Omunye wabantwana, uNkosazana Lethiwe Moyo ubikele intatheli ukuthi bathole ukuba uyise wabulawa ngamanye amalunga omdeni, njalo bathithibele ngokwacina kusenzakala.
Uthe ukufa lokuphambana kwabanye kubatshiye belembuzo eminengi.
“Sezwa ubuhlungu sitshonelwe ngubaba. Sacela obaba omncane ukuthi sidingisise ukuthi ukufa kukababa kungabe kwabangelwa kuyingozi kumbe kwabalesandla phakathi. Sekuyiminyaka emibili silokhe sithule kodwa kusidla emoyeni. Labafowethu sacina sisiya enyangeni, eyasitshela ukuthi ubaba wabulawa ngamanye amalunga omdeni. Akuzange kusiphathe kuhle lokhu.
“Sathi kungcono sitshaye ithuna, ubaba asibonise abantu abambulalayo. Sathola umuntu esambhadalayo, wayalungisa ebusuku wathi ngeke kuphele inyanga singabonanga lutho. Iviki ithe iphela omunye umfowethu uGideon Moyo waqala ukuphambana ingqondo waqamba abanye abathathu, wababuza ukuthi benzani kubaba aze awelwe yingozi yemota,” kutsho uLethiwe.
Uveze ukuthi sekuvelile njalo kuyaziwa ukuthi ngobani abalesandla ekufeni kukayise.
“Omunye umfowethu ozalwa ngubaba omncane wavuka elele phezu kwengcwaba likababa. Sambuza ukuthi kwenzakaleni, wathi kakwazi. Sikhuluma nje khathesi usehamba edobha izigodo lamaphepha esiya engcwabeni esiyaxolisa. Omunye owaqanjwayo ukuthi ulesandla ekufeni kukababa wedlula emhlabeni engagulanga. Abathathu laba abaseleyo sebengabantu abazulayo nje ngoba sebephambene lengqondo. Okwenza saze sahamba yikuthi sasihlala sitshelwa yibo abafowethu besithi lathi sizalandela ubaba. Amazwi la ayehlala esihlupha. Imuli iyasisola kodwa akukho esasingakwenza sihlala sisethuselwa ngokufa,” kutsho uLethiwe.
Ekhuluma lentatheli omunye wezakhamizi zakule indawo uNkosazana Stella Ndlovu ubike ukuba balesimanga ngabakubone kusenzakala
“Thina sabizwa lathi sisiyabona imihlola umuntu esevuke elele phezu kwengcwaba wabuza ukuthi kuhamba njani wathi yena kakwazi ukuthi ufike njani. Omunye owaqanjwa ukuba laye ulesandla ekufeni kukamuyi wabhubha engagulanga abaseleyo laba emicabangweni abasathathisisi kahle sebebhoda lemizi bengazwakali ukuthi bathini kwesinye isikhathi bayatshona bebhoda engcwabeni,” kutsho uNkszn Ndlovu.
