uMthunywa
Ethel Ncube
ZISELE zinkemile izakhamizi zeMafa, eLupane ngemva kokuba kuzwakale ukuthi kulembuzi ezele izinyane elisamuntu okuyisehlakalo esitshiye abantu bakule indawo betshotshobele. Lalamuhla abantu balokhu besankemile ngemihlolo abayizwileyo yiloba nje kubikwa ukuthi balutshwane abantu abalibonayo izinyane leli okuthiwa lalilezitho zembuzi beselisiba lezinye ezingani ngezomuntu.
Ngokutsho kwabasiki bebunda izinyane leli lahle lagqitshelwa masinyane abantu abanengi bengakaliboni.
Ekhuluma lentatheli omunye wezakhamizi uNkosazana Delani Ndlovu uveze ukuba kuliqiniso ukuba kulembuzi eyazala umuntu.
“Mina ngezwa ngabantu besithi umalukazana wakoNcube wezwakala egijima, ehlaba umkhosi ebiza abantu ukuthi bezombonisa imihlolo kodwa umkakhe wahle wamkhuza ethi kathule ulamawala. Ngokwenzenjalo abantu abalibonayo izinyane lakhona ngabomdeni kuphela njalo kubikwa phezulu lalilobuso obufana lobomuntu kusiya emahlombe kuthi phansi emzimbeni kwakuyimbuzi.
“Imbuzi le kuthiwa yazala kodwa ngesikhatshana basebegqibele izinyane lakhona njalo lapho abaligqibela khona akula okwaziyo. Akwaziwa ukuthi kungani bakwenza kwaba yimfihlo engaka,” kubika uNkszn Ndlovu.
Intatheli ibuye yakhulumisana lomunye oyisikhamuzi kule indawo owale ukuziveza igama ochaze ukuba ngempela le yindaba esegudwini esiqintini.
“Mina ngithe ngisesibhedlela seSt Luke’s kunsuku ezisanda kwedlula ngezwa omunye engibuza ethi ngivela lapho okulembuzi ezele umntwana ongumfana ngezwa ngimangala ukuthi sokugcwele indawo yonke le.
“Mina eqinisweni angazi okunengi ngalindaba kodwa abantu kithi bayakhuluma bathi imbuzi yazala isilo esingaqondakaliyo esifana lomuntu ebusweni, asazi ukuthi kungani abantu laba bengazange bathande ukutshengisa umphakathi isimanga esinjalo,” kubika umfakazi lo.
Ekhuluma lentatheli umvidikho uMnumzana Joel Ncube uveze ukuba laye wezwa ngesimanga lesi.
“Mina lami ngezwa ngabafana sebekhuluma lapha kuthiwa kulembuzi ezele ‘umuntu’, yikuthi lapho abakhona kungumango angizange ngiyefika khona kodwa ngabikelwa ukuba imbuzi izele ‘umuntu’,” kubika uMnu Ncube.
UMthunywa ukhulume loMnumzana Bhikitha Ncube ongumnikazi wembuzi eyazala isilo lesi wala ukuthi wakubona lokhu.
“Mina ngangingekho ngiye eSomgolo ngezwa abantu bethi imbuzi iphunze ‘umuntu’ kodwa lokhu angikubonanga, ngathi ngiphenduka sebekulahlile akula engakubonayo,” kuveza uMnu Ncube
Intatheli ivakatshele umalukazana wakoNcube okubikwa ukuthi nguye owaqala ukubona izinyane leli uNkosazana Betty Ndebele obetshengisela ukwesaba ukukhuluma ngodaba lolu ethi abanikazi bendawo kabakho.
“Mina ngingeke ngitsho lutho ngabe umkami ukhona ubengalilandisela yena. Imbuzi yazala into efileyo engasozinyane, kuyangehlula ukukuchaza kuhle.
“Into le yazalwa ifile yayagqitshelwa kodwa angikwazi lapho eyalahlelwa khona,” kuphetha uNkszn Ndebele.
