uMthunywa
YiNtatheli kaMthunywa
UHULUMENDE usebike ukuba imidlalo ezikolo izahlala imisiwe kumaviki ambalwa alandelayo kusakhangelilisiswa igcikwane leCovid-19 ngoba kungenzeka izibalo zabantu abahlaselwa ligcikwane leli zenyuke ngesikhathi somqando.
Kumbiko wakhe weKhabhinethi owethulwe nguSenetha Monica Mutsvangwa onguMpathintambo obona ngezokuhanjiswa kwemibiko, ezokukhangisa kanye lezokusakaza uhulumende ubike ukuthi kumqoka ukuthi abantu bahambe bayehlatshwa ijekiseni yabo yesithathu yeCovid-19 njengoba kuqhutshwa isigaba sesibili sohlelo lwelizwe lonke lokuhlaba lijekiseni.
Uthe zonke izabelo zizaphatheka kuhlelo lolu ngaphansi kwesigaba sesibili sohlelo lokuhlatshwa ngokusebenzisana ndawonye labaphathi bomphakathi.
“Ngesikhathi lapho ilizwe lisenza kahle ngokumelana lomkhuhlane we-Covid-19, ikhabhinethi lobakunjalo ikhuthaza izakhamizi ukuba zihlale ziqaphele njalo zilandele imithetho eyafakwa yiWorld Health Organisation njalo imithetho efaneleyo izaqhubeka isetshenziswa,” utsho njalo.
“Ngaphezu kwalokho kuqakathekile ukuba isimo lesi sinakwe kabanzi ezikolo kumaviki ambalwa azayo ngaphambi kokuba kubuyiselwe imidlalo ezikolo, sikhangele ukuba ukuvulwa kwezikolo futhi lokuqala kobusika kuvame ukuhlanganela lokukhwela kwezibalo ze-Covid-19.”
NgoMvulo kubikwe ukuba inani lababanjwa i-Covid-19 elizweni liku 248 531 labasilileyo abayi 242 118 njalo sokufe abantu abayi 5 497.
“Ngesikhathi lapho ilizwe lisenza kahle ngokumelana lomkhuhlane we-Covid-19, iKhabhinethi lobakunjalo ikhuthaza izakhamizi ukuba zihlale ziqaphele njalo zilandele imithetho eyafakwa yiWorld Health Organisation njalo imithetho efaneleyo izaqhubeka isetshenziswa,” utsho njalo uMphathintambo.
UMphathintambo Mutsvangwa ubike njalo ukuba ikhabhinethi yamukele iMemorandum of Understanding (MoU) phakathi kweZimbabwe leSouth Africa kuzifundo eziyisisekelo.
Uthe “iMoU izagqugquzela ukubambisana phakathi kwezinhlangothi zombili ekutshintshaneni kwamalunga lezifundiswa endaweni yezifundo zamabanga aphansi kanye laphezulu, ukunikwa kwabafundi indawo lokufundiswa kwababalisi lapho inhlangothi lezi zizabeka ukungeniswa kwabafundi ezikolo zabo ezifaneleyo batshintshane ulwazi baphatheke njalo kumakhomfulensi emfundo azahlelwa ngamaqembu la amabili,”.
Uthe ukubambisana lokhu kuzaletha ukusebenzisana kwendawo kwezikolo lekhomishini ephezulu yeUnited Nations Educational Scientific and Cultural Organisation (Unesco) emazweni ahlukeneyo lokwabelana ulwazi mayelana lokuthuthukisa izakhiwo zezikolo, ukuthuthukisa ababalisi, ukuthuthukiswa kwendlela zokufundisa lasekuhlolweni lokuvivinywa.
Mayelana lokulima kwesikhathi sobusika ngomnyaka ka-2022, uNgqongqotshe Mutsvangwa uthe ama-industry akuleli alengxenye eyaneleyo yamafethalayiza ukuba aqinisekise ukuba laba abaqhuba inhlelo zokulima ngobusika bayithole kanye lezinye izidingeko zokuthengisa.
Uthe ifethalayiza ekhona igoqela eyasala kusizini edluleyo, leyinye engaphansi kweCollateral Management Arrangement (CMA) ezavulwa nxa imali edingakalayo isifakiwe.
