Imidlalo ngosuku lwe-Africa Day

23 May, 2024 - 00:05 0 Views
Imidlalo ngosuku lwe-Africa Day football...

uMthunywa

Nkosilathi Sibanda

NGEMPELAVIKI le akubizwa ozwayo enkundleni zemidlalo etshiyeneyo kuleli.Kuzabe kulikhefu le-Africa Day, okutsho ukuba abathandi labalandeli bezemidlalo bazathola ithuba lokuthi bayezikholisela bebukele ithalenta lokuchitha isizungu.

Imidlalo yebhola lenyawo iyaqhubeka kuligi yeCastle Lager ngoMgqibelo langeSonto. Ikhona njalo imidlalo kuligi yeZimbabwe Football Association (Zifa) Division One kumhlubulo ongezansi yelizwe.Zizagcwala phamu inkundla emalokitshini kubukelwe imidlalo yenguqu yobungane ngaphansi kweBulawayo Social Soccer League.

KoBulawayo akubizwa ozwayo kumdlalo wengqindi, i-boxing. Bonke abalandeli bomdlalo lo sebenxuswe ukuthi baze ngobunengi babo ePalace Hotel ngosuku lwe-Africa Day. Abaqoqi bomncintiswano batshele intatheli yeZimpapers Sports Hub ukuthi kuzadibana ingqwele zokujika isibhakela ezivela kuzabelo zonke zelizwe.

Umncintiswano uqoqwe yinhlanganiso yeZimbabwe Boxing Federation isekelwa yiPalace Hotel.Kukhangelelwe abadlali abaphuma kumaqembu abalisa iZimbabwe National Army, Zimbabwe Prisons and Correctional Services, Air Force of Zimbabwe, Tshaka leNketa, Black Rhinos, HQ 1 Brigade, 5 Brigade, Bulawayo Metropolitan, Bulawayo, Harare, Midlands, Victoria Falls Boxing Academy, Manyuchi Boxing Academy, Masvingo, Gwanda leHwange.

Umqondisi weZBF, uSteven Masiyambumbi uthe: “Sihlose ukunika abatshayi besibhakela ithuba lokuthi badlale kumincintiswano eminengi.”

Kumdlalo we-basketball, indlela ziqonde enkundleni yeKhanyisile lapho okuzabe kulomncintiswano weBulawayo Basketball Association (BBA) All Stars. Kuzadlala amaqembu ayisithupha, kumidlalo elohlelo olungajwayelekanga nanko phela amaqembu azabizwa ngebizo lomqeqetshi.

Iqembu leTeam Innocent lizadlala leTeam Thabo, iTeam Farai leTeam Charles, leTeam Beatrice v Team Michelle. Kubikwa ukungena enkundleni yi$1. Phezulu kwalokhu, inhlanganiso yeBBA iphakathi kohlelo lokufundisa onompembe oluqale ngoLwesithathu lusiyagqitshwa ngoLwesihlanu eTennyson Primary School.

Kumdlalo we-chess, ikolitshi leChessmates Academy libika ukuba seliqalisile ukufundisa abantwana kulumdlalo. Kunxuswa bonke abantwana ukuthi baze ngobunengi ukuzofundela umdlalo lo.Umqondisi weChessmates Academy, uPrisca Sibanda uthe bafuna ukuthi basebenzisane lezikolo labazali kuhlelo lwabo lokukhulisa umdlalo we-chess.

Share This:

Sponsored Links

Survey


We value your opinion! Take a moment to complete our survey

This will close in 20 seconds