Khanyile Ndebele
INDLELA intsha yakulezi insuku ethathela phezulu ngayo izidakamizwa isikhathaze inhlanganiso yeNational Aids Council (Nac) ebike ukuba izidakamizwa ziyimbangela yokumemethaka kwegcikwane leHIV kwabasakhulayo.
Lokhu kuvezwe ngumqondisi we-Nac esabelweni sakoBulawayo, uNkosikazi Sinatra Nyathi ngesikhathi esethula umbiko ngesimo sokusetshenziswa kwezidakamizwa kumkhosi wokunanza i-International Day Against Drugs and Illicit Substance Abuse ngoLwesihlanu.
uNkosikazi Sinatra Nyathi
Umkhosi lo uqhutshelwe eStanley Square eMakokoba lapho obekuhlangene khona izakhamizi, abantwana besikolo, ababalisi lenkokheli zomphakathi.
UNkkz Nyathi uthe sebenanzelele ukuthi ngemva kokunatha izidakamizwa, abasakhulayo bayehluleka ukuziphatha kuhle, okudala ukuba bakhwabithe ukuya emicimbini, baye emacansini bengazivikelanga.
“Abasakhulayo bathanda ukuhlanganela emicimbini le, ebizwa ngokuthi ngamaVuzu. Kulobufakazi bokuthi emicimbini le kwandise ukusetshenziswa izidakamizwa lotshwala. Isiphetho bacina besenza ucansi bengazivikelanga okuyingozi ngoba kucina kumemethekisa igcikwane leHIV,” kutsho uNkkz Nyathi.
UNkkz Nyathi uthe ngokudingisisa kwe-Nac, kulesilinganiso sengxenye ekhulwini (50%) sabatsha abatholakala belegcikwane nxa bangahlolwa.
Uthe bakhangelele ukuthi kusiyafika umnyaka ka2030 inani leli lehliswe, kuphindwe kubotshwe isinqumo sokuthi kwehliswe ukufa kwabantu ababulawa ligcikwane ngesilingangiso se-90%.