uMthunywa
Siqhubeka ngemibhalo engalotshwanga, sizakhangela Inganekwane. Inganekwane zona ziyindatshana nje emfitshane ayayilandiswa kakhulu ngogogo, ugogo elandisela abazukulu bakhe ngesikhathi sokuzilibazisa. Inganekwane zaziyingxenye yempilo yezolo, bekuyizo ebezichaza impilo yomuntu, beziyingxenye yempilo njalo ziyisibuko sempilo. Inganekwane lezi yizo njalo eziqukethe zibuye ziveze njalo imvelo yomuntu.
Ogogo labo babamkhulu babegcina inganekwane lezi emakhanda abo kungelandawo lapho ababengazigcina khona loba nje bazibhale ngendlela yokuzigcina, lilifa elimqoka okwamagama elaligcinwa emakhanda.
Kuyisimanga esikhulu ukuthi lokhu babekwenelisa bengelahlupho. Inganekwane ke zazifundwa zisedluliselwa kwesinye isizukulwane esilandelayo ngendlela efanayo, laleso sizukulwana laso sidlulisela kwesilandelayo kanjalo kanjalo.
Kesikhangele ukwethiwa kwenganekwane.
Izikhathi ezinengi inganekwane zazisethelwa abantwana, kwakuthi labo ababesethelwa babethula baqaphela ngendlebe kanye langamehlo. Lapho olaleleyo wayezithola kulokunye ayengakuzwisisanga wayesenelisa ukubuza kugogo kumbe kulowo owethayo ukuze athole ukuqondiswa kanye lokuzwisisa kulokhu ayengakuzwisisanga kuhle.
Inganekwane lezi bezisethiwa ntamabama nje ngemva kwemisebenzi yosuku, lokhu kuyindlela yokuphumuza umzimba kanye lokuzilibazisa ingqondo. Lapho siqathanisa kafitshane kulezinsuku siyanzelela ukuthi abantwana kanye nje labadala sebelendlela yokuzilibazisa thize lapho abatshona begxile khona kumabonakude kanye lemidlalo thize ethuthukileyo, yikuzikwejisisa okufana lalokhu obekusenziwa ekadeni abantu bezilibazisa ngokwethiwa kanye lokulalela inganekwane.
