uMthunywa
Ethel Ncube
ZILOKHU zikhakhamele izakhamizi zeDete ngemva kokuba imbuzi zithe zisidla zahlangana lesidumbu emasimini zazama ukuqwanda okudale ukuba umfana owelusayo agijimele khona wathola ingcwaba.
Isiga lesi senzakale ngoLwesine lweviki ephelileyo lapho okubikwa umsolwa uShyleen Ncube ekhuphe isisu wayangcwaba usane emasimini olucine luphandwa zimbuzi, uMthunywa ukuzwile lokhu.
Ekhuluma lentatheli omunye welunga lemuli uveze ukuba umalukazana wabo wenza isihluku esasingacatshangelwa.
“Umfana wembuzi wayesedlula esiyathinta imbuzi zakhe wahlangana lazo sezisensimini wagijima esiyazikhipha wathola ukuba lapho ezidla khona kungcwatshwe usane wahle wagijima wayabikela abadala kanti usetshela umamazala walo owalahla umntwana.
“Umamazala wabikela amapholisa abuya azogebha athatha isidumbu somntwana ongumfana owayegoqelwe ngamalembu,” kutsho omunye welunga lemuli ongathandanga ukuqanjwa ngebizo.
Uqhubekele phambili eveza ukuba okwenza bacabangele ukuba kungabe kunguShyleen okhuphe isisu yikuthi wayezithwele kodwa wanyamalala bamdinga bamthola esibhedlela.
“Okwenza umsolwa wabanjwa yikuthi uninazala wayecabangela ukuba insuku zokubeletha sezenele kodwa kakezwa lutho ngomzukulu omutsha wagijima wayamdinga wamthola kuthiwa uthwalelwe esibhedlela.
“Amapholisa alandela esibhedlela athola umsolwa engaselaye umntwana esithi uswele kodwa kavezanga ukuthi kwenzakala njani okwenza amapholisa ahle akholwa ukuba nguye okhiphe isisu wayangcwabela umntwana emasimini njalo akwazakali ukuthi umntwana lo wangcwatsha ephila loba esetshonile,” kutsho ilunga lemuli le.
Imizamo yokuxhumana lesikhulumi samapholisa eMatabeleland North uInspector Simphiwe Makonese yehlule ngoba ucingo lwakhe belungangeni.
