uMthunywa
Ethel Ncube
SEBETSHAYWA ngumoya abazali besikolo seMajiji Primary nanko sekulungisiwe obekukhathaza ababalisi kumaviki adluleyo.
Kucatshangelwa ukuba ukhona obesebenzisa imbuzi yesinye isakhamuzi esakhele duzane lesikolo lesi ukuthi “ihlukuluze” ababalisi besikolo lesi.
UMthunywa ulobufakazi bokuthi isikolo lesi sivulwe ngoLwesibili kuyonale iviki, kulandela ukuvalwa kwaso okwamaviki amathathu ngenxa “yabondofa” abakade besiya emacansini lababalisi.
Ngokunjalo, iphephandaba likazulu lilandele loludaba kwavela ukuthi izifundo ziqale kakuhle njalo bonke ababalisi sebephendukile emsebenzini.
Kubikwa ukuze kulungisiswe ngabondofa abakade behlupha, izakhamizi zacela ukusizwa nguSithembiso Moyo-Dlamini, odume ngokuthi nguMaDlamini, onguye ofike wahlanza isikolo.
UMaDlamini utshele intatheli ukuba ukhiphe imbuzi.
“Sikhuphe imbuzi ebihlala esikolo.
Imbuzi le ibingachemi, ingadli, ilala esambuzini.
Layo ngenye ebisetshenziswa ukuhlukumeza ababalisi lapha esikolo.
“Sikhuphe lokunye okunengi nje okuyikho obekusetshenziswa lakho ukuhlukuluza ababalisi,” kubika uMaDlamini.
“Ngikhuluma ngiseBubi ngilapha okwesikhatshana ukuze ngibone ukuba konke kuhamba kuhle.”
Omunye wezakhamizi zakulindawo uMnumzana Nkosana Jubane ubike ukuba loba isimo sesingcono, sekufundwa, balokhe belokwesaba ukuthi “izinto” ezikhathaza ababalisi zingaphenduka.
“Sekusetshenziwe.
Sekufundwa esikolo njalo lababalisi bakhona.
Siyethemba ukuba akusoze kube lokuphazamiseka kwabafundi lababalisi.
Kukhitshwe imbuzi lokunye okungani yinja okuthiwa yizo izinto ebezihlupha esikolo,” kubika uMnu Jubane.
Kubikwa umnikazi wembuzi ufike wathatha isifuyo sakhe waya laso emzini wakhe.
Iphephandaba likazulu lixhumane lomnikazi wembuzi le ebihlupha, othe kuyamangaza ukuthi kungani kuthiwa yisifuyo sakhe esenze lokhu.
“Imbuzi yami itheniwe.
Kuyangimangaza ukuthi ibilala labantu njani? Ngifikile kumama lowo obehlanza isikolo ngathi kanti imbuzi yami ibotshelweni ngifuna ukuchazelwa kuhle, wathi kukhona okungaqondanga ngayo,” kutsho umnikazi wembuzi lo, ocele ukuthi ibizo lakhe lingavezwa.
“Ngabuza ukuthi kuyini okungaqondanga ngembuzi yami, wathi sokumele ngimbone, ngichazelwe ensitha okuyinto engingazange ngithande ukuyenza.”
