uMthunywa
Nontobeko Sibanda
UMCULO wembube usuthole usekelo oluzwayo nanko lasedolobheni leGwanda sekubunjwe iqembu elitsha elitshisekela ukuthokozisa uzulu ngalumculo.
Iqembu leli, elibizwa ngokuthi Fasimbi, lisungulwe ngabafana abasakhulayo abayisitshiya galolunye. Bakhethe ibizo elithi Fasimbi, okwakulibutho lenkosi uTshaka.
Ukubunjwa kweqembu kuze ngesikhathi inengi labalandeli bembube bekhalaza ngokutshabalala komculo, ikakhulu edolobheni leGwanda.
UEdgar Ncube olilunga leFasimbi uthe isizatho sokubunjwa kweqembu labo yikuthi bavuselele umculo wembube.
“Njengeqembu sananzelela ukuthi umculo wembube usutshabalala kancane kancane kukanti kudingakala ukuthi uvuselelwe ngakho sakhetha ukuthi siwuvuse ume ngezinyawo,” kutsho uNcube.
Uthe iqembu labo kalikabi lengoma kodwa lilungiselela ukukhipha idlalade labo lokuqala.
“Kasikabi lengoma esezisemphakathini kodwa kukhona esikuphekela abalandeli bomculo wethu ngoba silungiselela ukukhipha idlalade lethu lakuqala elizabe liqukethe ingoma ezilitshumi,” kutsho uNcube.
UMthabisi Moyo ongelinye ilunga leqembu uthe njengequla bazimisele ukufundisa uzulu ngengoma zabo.
“Umculo wethu ujonge ukufundisa abantu ngezehlakalo ezitshiyeneyo empilweni ezigoqela inkolo, amasiko, uthando kunye lokujabulisa abalaleli bethu.”
Uthe bakhangelele ukuthi bathole usekelo emphakathini njengoba beliqembu elisakhulayo.
“Siliqembu elisakhulayo njalo sikhangelele ukuthi senze imicimbi eminengi ukuze sithole abalandeli abanengi.
UMoyo ubuye wathi njengeqembu bafuna ukuphakamisa isabelo seMatabeleland kwezomculo.
“Sizimisele ukuthi siphakamise umhlubulo wemaNdebeleni ngomculo wethu njalo waziwe langaphetsheya kolwandle. Sifuna ukutshiyela abantwabethu ilifa,”
Kusenjalo, iqembu elisacathula leli libika ukuba lidinga usekelo.
“Sidinga ukuphathiswa njengeqembu ngemali ukuze senelise ukuyabhalisa ingoma zethu lokuthi sithole impahla zokuhlabelisa ngoba sikhangelele umncintiswano ozabakhona koBulawayo ngenyanga kaMpandula,” kubika uNcube.
