Uncategorized

Imali yimpande yesono! . . ipholisa lihlahlela umkalo, qede lizibulale

04 May, 2023 - 00:05 0 Views
Imali yimpande yesono! . . ipholisa lihlahlela  umkalo, qede lizibulale

uMthunywa

Thokozile Mbedzi
IMALI ngumxabanisi!

Lokhu kuchaza ngqo isehlakalo esenzakale elokitshini leDulibadzimu, eBeitbridge lapho enye indoda elipholisa lekhansilini yeBeitbridge ehlahlele umkayo ongusiphatheleni ngehloka ekhanda, qede yazihilela kubangwa imali.

Kubikwa uPaul Mleya oleminyaka engu-62 yokuzalwa, ohlala ku-377 eDulibadzimu ubulele unkosikazi wakhe uRosemary Dube (36), obengusiphatheni. Kubikwa unkosikazi wakhe lo, ubesejele okwenyanga ezintathu ngemva kokubotshelwa amacala amabili okutshaya umakhelwane ngesitina.

Isisusa sokulwa kwezithandani lezi, ebezihlala zonke sivele ekuthini, uDube wathi evela ejele, wafica ukuba imali ayeyitshiye endlini yayingasekho.

Ihloka

Ekubuzeni kwakhe ngalimali, kubikwa uMleya wavuka ngolaka, kwaba yikuqala komsindo endlini.

Iphephandaba likazulu lizwe ukuba ababili laba balwa ekamelweni labo lokulala kwathi umntanabo oleminyaka engu-15 ezothatha amafutha okugcoba ekuseni wathola unina esefile. Uthe esithi mehlo suka, wabona lemota esetshenziswa ekhaya ingekho egarajini.

Imota le kuvele ukuba yatshayelwa nguMleya ngesikhathi eqonde ukuyazibophela.

Isikhulumi samapholisa esabelweni seMatabeleland South u-Ispector Loveness Mangena uthe baphezulu kokucubungula udaba lolu.

“Udaba siluphethe njalo amapholisa asaphenyisisa ngokwenzakalayo.”

Omunye wabomakhelwane abancwebe uMthunywa ngaloludaba, uMnumzana Khakhathi Moyo uthe okwenziwe nguMleya lihlazo.

uInspector Loveness Mangena

“Kubuhlungu lokhu. Lokhe siswele lokuthi singakubiza sithini okwenzakale emzini weDulibadzimu,” kutsho uMnu Moyo.

“Umuntu sengaze athathe isikhali sibili agamule umkakhe. Loba sekutheni, akuvumi ukuthi umuntu wesilisa aphathe umkakhe ngalindlela aphinde ambulale kabuhlungu kanje.”

UMnu Moyo uchaze kabanzi ngesehlakalo lesi.

“UNkosikazi kaMleya simazi engumuntu obethengisa i-airtime lokuba ngusiphatheleni. Sizwe ukuba ubetshiye imali engange-R78  000 le US$972 endlini. Ubesejele ebotshelwe ukutshaya umakhelwane ngesitina. Ekuphendukeni kwakhe ejele, esebuza uMleya ngemali le, yikho abaqala khona ukulwa.

“Wathola uMleya esedle imali yonke. UMleya sizwa ukuthi wadobha ihloka walithela ekhanda, esola ukuthi kungani embuza ngemali le. Lokhu kube buhlungu njalo asifisi isenzo esifana lalesi  senzakale futhi edolobheni lethu,” kutsho uMnu Moyo.

Esinye isakhamuzi seDulibadzimu uMnumzana Dignity Ncube uthe indaba le isiphethwe emlonyeni lidolobho lonke. Usole kakhulu isenzo sikaMleya wagcizelela ukuba umzenzi kakhalelwa. Uthe ngemva kokubulala umkakhe, uMleya waphenduka isithutha.

“Eseqondane leqiniso lokuba usebulele yikho lapho abona khona ukuba usewonile. Wasuka lapho wayazibulala amapholisa esamdinga,” kutsho uMnu Ncube.

UMnu Ncube ukhuthaze abesilisa ukuthi benqabele ukwenza okunje, kodwa bazame ukuzehlisa.

“Abesilisa abayekele umkhuba wokudelela abesifazane ngoba kubi lokhu.”

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds