uMthunywa
ABADLALI beqembu lama-Gems bathole imivuzo ye200 pounds munye ngamunye kulandela ukunqoba iBarbados kumdlalo wabo we-Vitaliy World Cup kuliviki.
Usizo luvele kunkampani yeNgilandi ebizwa ngokuthi yi-Express Links International. IZimbabwe inqobe iBarbados nge 66-41, okwenze umaqhuzu walinkampani uPeter Pembere aphitsheke ngokuthi abadlali baphiwe imali ngokwenza kuhle.
Inhlanganiso yeSports and Recreation Commission ibonge kakhulukazi inkampani yeExpress Links International.
Ekhulumela linhlanganiso, ilunga lebhodi uTitus Zvomuya ukhethe ukuthi ahle athi bhadla kuFacebook ebonga.
“Siyabonga kakhulu kuPeter Pembere ngokwenza lokhu.”
Kusenjalo, iZimbabwe isendleleni yokufikisa isibanga sokucina somncintiswano we-Vitality Netball World Cup nxa ingenelisa ukudla isizwe seMalawi ngoLwesine.
Ukudlala kwamaGems kubeyisimanga kulabo abangakaze babukele lumdlalo.
Abadlali laba badonse isikhathi eside bedlalela indlala, bengaholi lutho.
Kubikwa ukuba ngenxa yokuthi amaGems asedlala kuWorld Cup, sekulamankampani aseveze ukuthi afuna ukuba yingxenye yomdlalo wokuqaga.
Abakhokheli be-netball bathi kade baqala ukuncenga amankampani labantu abalemali kulelidolobho kodwa belokhe betshaya edwaleni.
Sekulesikhathi umdlalo wabodade ungelamali esambeni sawo. Imali kulumdlalo ibonakala nxa kuthe kwaba lomqhudelwano obuthanisa amaqembu ezabelo kumbe uma umdlali ethe wakhethwa kuqembu lesizwe.
Kuleli umdlalo wokuqaga udlalwa kakhulukazi koBulawayo laseHarare.
