YiNtatheli kaMthunywa
IBHANGA lesizwe eleReserve Bank of Zimbabwe likhangelele ukwethula imali entsha eyamaphepha kanye leyamatshe kumaviki amabili azayo.
UGavuna webhanga lesizwe uDokotela John Mangudya uphinde waveza ukuthi kuzakhutshulwa lemali abantu abenelisa ukuyikhipha ebhanga ngeviki, kumhlangano weMonetary Policy Committee (MPC) oqhutshwe okwamalanga amabili ngoMvulo langoLwesibili.
Uthe ukulethwa kwemali entsha yama$5, $2 kanye leyamatshe engama $5 lama $2 kukhangelelwe ukuthi kuqede udubo lokusilela kwemali emabhanga.
Kubikwa okwenza kungakhitshwa imali ezinkulu uDkt Mangudya uthe imali entsha le izalingana lemali yama-bond ngendlela yokuthenga njalo izatholakala kakhulu kunyanga eziyisithupha ezilandelayo.
“Sivumelane ukukhweza imali esetshenziswayo eyiyo ebhoda emphakathini isuka ku$768 miliyoni isiya kuleyo ezakulingana leyomhlaba wonke. Khathesi imali esebantwini yi-$19 billion, imali yakhona ingange 4 phesenti, ngaphandle kwelizwe kulwisana le 10 kusiya ku 15 phesenti,” kutsho uDkt Mangudya etshela intatheli eHarare.
“Sifuna ukuqinisekisa ukuthi isimo somnotho sakuleli silemali eyeneleyo. Kunyanga eziyisithupha ezilandelayo, siyabe sifaka imali kumnotho, imali ebambekayo.
Kubikwa imali entsha kayisoze ibizwe ngokuthi yi-bond, kodwa izathiwa ngama-dollars njalo izakuba yi 1:1 lemali yama bond.
Uthe isinqumo lesi siza ngemva kokuveza kwamalunga ekhomithi yezemali ukukhathazeka ngokusilela kwemali.