uMthunywa
Ethel Ncube
INHLANGANISO yeGreen Afrique ikhuthaza abalimi ukuba balime i-passion fruit ngoba ilomkambo omuhle emazweni aphetsheya.
UMphathi omkhulu weGreen Afrique uMnumzana Anglistone Sibanda ukhuthaze abalimi ukuba kabaphatheke ekulimeni i-passion fruit bazitholele imali yabo enhle.
UMnu Sibanda uveze lokhu ngempelaviki koBulawayo ngesikhathi efundisa ngokulinywa kwezithelo.
Uthe labo abadinga ulwazi bakhululekile ukufika enkampanini yakhe yeGreen Afrique ukuze bathole ulwazi olugcweleyo ngokulinywa kwezithelo ezilemali emazweni aphetsheya.
“Balimi asivukeni ebuthongweni sizitshayele imali ngokulima izithelo ezilomkambo omuhle ezifana labo passion fruit. Isithelo lesi kasidingi okunengi.
“Okufunakalayo yikuba ube lomhlabathi lamanzi kanye lezigodo. Umvundiso awuthengi uyazenzela wedwa ngemva kokuhlonyiswa ngolwazi yiGreen Afrique kanye lemithi yokufafaza ayiduli, eminye uyazenzela,” kubika uMnu Sibanda.
Ihekitha eyodwa ilakho ukutholisa umlimi imali engaba yiUS$50 000
Uqhubekele phambili eveza ukuba ungalima i-passion fruit kuhekitha eyodwa ulakho ukuthola ius$50 000.
“Ihekitha eyodwa ilakho ukutholisa umlimi imali engaba yiUS$50 000. Okudingakalayo nje yikuthi njengomlimi ulime thina sibuye ngokukuncedisa ngolwazi uze uvune.
“Ungavuna sesihambisa isivuno sakho phandle kwamazwe. Kungakho sithi balimi sondelani sincedisane lithole ulwazi ngokulima izithelo lizitshayele imali enhle,” kuphetha uMnu Sibanda.
